غير مصنف

رواية خادمتى ولكن ج2 – لولو طارق – الفصل الثانى والعشرون

مرحباً بكم أصدقائي وأحبابي عاشقي القراءة والروايات الرومانسية مع رواية رومانسية جديدة للمتألقة لولو طارق والتي سبق أن قدمنا لها العديد من القصص والروايات الجميلةعلي موقعنا قصص 26 وموعدنا اليوم مع الفصل الثانى والعشرون من رواية خادمتى ولكن ج2 – لولو طارق 

رواية خادمتى ولكن ج2 – لولو طارق – الفصل الثانى والعشرون

تابع من هنا: جميع فصول رواية خادمتى ولكن ج1 -لولو طارق

اقرأ أيضا: روايات رومانسية

رواية خادمتى ولكن ج2 - لولو طارق
رواية خادمتى ولكن ج2 – لولو طارق

رواية خادمتى ولكن ج2 – لولو طارق – الفصل الثانى والعشرون

فتحى عمل نفس الصندوق لروان .. وبنفس الطريقه
منيره : الله يا فتحى .. ومخبى عليا يا راجل كل دا .. وانا فين يا فتحى ..
فتحى : شال علبه صغيره فيها سلسله عليها صورته هو واحفاده وريم وروان ومنيره .. وعلقها فى رقبة منيره .. هى دى حاجتك يا حبيبتى .. وبيبوس راسها .. انتى الاصل يا منيره .. لازم كلنا نبقى معاكى على طول
منيره : بحب .. ربنا ما يحرمنى منك ..
فتحى : يارب يا حبيبتى .. الواحد كل ما يكبر .. لو جاله شوية برد بيحس انه قريب من الموت .. وبيخبط على بابه ..
منيره : كل واحد وله عمره .. شيل من دماغك وسيبها على الله .. ارضى ربك وبس
فتحى : ونعمه بالله .. ربنا يرضى عنا جميعا
**********************
انتهى اليوم وبدء يوم جديد بشمس تشرق بانوار ذهبيه .. ونسائم هواء تتمايل معها الاشجار وتزقزق لتميلاها العصافير
*******************
مروان : صباح الخير يا شريف .. خير بتتصل على الصبح ليه .. انتو بخير
شريف : مش قوى يا مروان .. انا مانمتش انا وهدى من امبارح .
مروان : فى ايه يا شريف قلقتنى
مازن : واقف بيشاور له .. فى ايه
شريف : قص لمروان كل ما حدث .. بس يا سيدى .. والاستاذ محدش شاف وشه من امبارح .. والابله الا جابها مطلعه عينى انا وهدى من امبارح يادوب لسا مخموده دلوقتى .. وهدى فصلت ياعينى عليها . وانا مش ها اقدر اسيبها مع الست والا البنت دى واروح الشغل .. او حتى انا شربت 300 فنجان قهوه
مروان : ابنك بيهزر .. وازى يعنى يسيبها معاكو كدا
شريف : والله يا مروان هى شكلها غلبانه قوى .. لدرجه انها ماسكه فى هدى ولا كأنها أمها .. نفسى افهم حكايتها ايه .. وابنى دا مش جديد عليه بلوه ورا بلوه لما ها يجيب اجلى
مروان : بردو الامر ما يسلمش ياشريف .. خلى بالك على نفسك .. وطمنى عليك .. وقفل
مازن : ايه فى ايه
مروان : مش وقته .. بعدين ها اقولك .. ومسك التليفوم بيتصل على احمد مقفول كريم مقفول طارق مقفول .. بصوت عالى بنى ادمين يتفات لها بلاد الاستهتار فى دمهم انا زهرقت
روان : لابسه ونازله معاها سمسمه .. وروكا وراها هى وميرنا ..
مروان : جاهزين
كلهم : ايوا ..
مروان : ياله .. هو خد روان وسمسمه وهيثم خدهم وراح على الشركه ..
مازن : ركب مع ماندو .. هو وروكا .. وميرنا ركبت عربيتها وراحت على عيادتها ..
مروان : ايمن لو سمحت هاتلى ورق فرع اسكندريه
ايمن : حاضر يا مروان بيه ..
روان : ماسكه سمسمه وداخله ورا مروان .. فى ايه يا مروان .. مالك .
مروان : زهقت من عمايل الاستاذه امتى يكبرو ويبطلو يرمو الحمل كله علينا
روان : طول عمرك شايل حمل الكل .. جاى تزهق دلوقتى
مروان : ما توصلش لدرجه اننا نحط اهلنا فى خطر يا روان ازاى بيفكرو دول
روان : فى ايه قلقتنى
مروان : قص لها كل ما حدث
روان : بتخبط على رجلها جااامد . وبتضحك لدرجه ان مروان ضحك على ضحكها
مازن : دخل عليهم .. ضحكونى معاكووو .
روان : شريف وهدى بيتعمل معاهم الصح ..
مازن : من غيرى .. لا كدا فيها قاعده .. اعرف كله
روان : قصت كل شئ
كله
مازن : ههههههههه والله ووقعت فى شر اعمالك يا شرشر انا لازم اتفرج …
مروان : حلو حكاوى القهاوى دى ..
سمسمه : بابى .. هو طارق اتجوز على طنط هدى
كلهم : 😂😂😂
مازن : هدى امه .. انتى فاهمه الجواز غلط
سمسمه : مين دى الا عايزا تبوس طارق
مروان : عيب يا سمسمه .. ما ينفعش نتدخل فى كلام الكبار
سمسمه : يابابى انتو الا بتقولو قدامى
مروان : عندك حق احنا غلط .. وبيبص لروان ومازن .. افصلو بقى .. مش اى كلام نتكلم فيه عااادى كدا قدام الاطفال ..
مازن : سامسيمو ياولا
سمسمه : عمووو مزاميزو اللذيذ
مازن : ورايا ياله .. نجيب تسالى .
روان : كفايه يا مازن .. البنت بقت بتاكل كتير بسببك
سمسمه : وانتى يا مامى بتاكلى معانا
مازن : بيتكو من القزاز بتحدفونا بالطوب ليه .
مروان : اتكل ياله ..و بيبص لسمسمه .. مع عمووو وما تاكليش كتير اوكى
سمسمه : حاضر يا بابى .. وبتبعتلوو بوسه فى الهوا .. اموووه .. وبتبص لروان .. اموووه وخرجت ..
روان : ها تعمل ايه .. ها نروح لشريف
مروان : طبعا .. لو البهاوات ما ظهروش انهارده .. ها اروح له ونسهر معاهم او اقوله يجبها ويجى يقعد معانا
روان : ربنا يستر يا حبيبى ان شاء الله خير .
مروان : يارب
*******************
عدى وقت .. وهدى نايمه جمب حور الا ماسكه فيها زى الاطفال .. وفاقت على كلام حور وهى نايمه ..
حور بتتنفس بصوت عالى وعرقانه جدا وبتتحرك وهى نايمه : ماما .. ماما .. ما تسبينيش .. انتى بترمينى للدنيا وقساوتها . ماما حاسبى اوعى تقعى . وبتصرخ واتنفضت من مكانها . وبعلو صوتها ماما . وبتنهج جااامد وعرقانه ..
هدى : بتطبط عليها مالك فيكى ايه
شريف سمع صوت صرختها دخل عليهم : فى ايه يا هدى ..
هدى : مفيش يا حبيبى شكلها كانت بتحلم بكابوس ..
شريف : بيبص لهدى باصة اطمئنان عليها . وهدى طمنته وخرج ..
هدى : قومى خدى شاور وها اجيبلك هدوم من عندى وغيرى العبايه دى
حور : مسكت العبايه لا العبايه لا .
هدى : ابقى اغسليها والبسيها تانى . قومى ياله
حور : قامت ودخلت الحمام .. قعدت على البانيوو وفضلت تعيط كتيرر
هدى : حور .. حور
حور : بتمسح دموعها .. نعم
هدى : افتحى خدى الهدوم دى وشوفى ها تنفعك والا لاء
حور : فتحت فاتحه صغيره .. وخدت الهدوم وقفلت ايوا ها تنفعنى شكرا
هدى : ابتسمت الشكر لله ونزلت تحت
حور : ملت البانيوو ميه . ونزلت فيه .. وكل شويه تاخد نفس وتغطس وشها فيه وترجع تانى
شريف : اطلعى شوفى هى اتاخرت ليه فوق .
هدى : حاضر .. طلعت ودخلت الاوضه فاضيه .. خبطت على باب الحمام ..
حور : ايوا
هدى : انتى محتاجه حاجه .
حور : بتفتح الباب ولابسه البجامه الا هدى ادهلها وشعرها سايب .. طويل جدا جدا وشكلها صغر 30 سنه .. جميله ورقيقه وجسمها متناسق
هدى : حطت ايديها على بقها وبتشهق .. ايه دا .. وماسكها وبتلفها .. انتى صغيره قووى .. طب ليه لابسه كدا .. مش بتلبسى حاجه تبين سنك الحقيقى ليه .
حور هزت راسها : طارق يا حماتى بيغير موووت .. ودايما يشترلى عبايات كبيره .. ويقولى عشان محدش يشوف جسمك يا حور
هدى : بتهز راسها اه طالع لابوه شرشر
حور : اقوله يا طروقتى .. حرام عليك كبرتنى اهئ اهئ .. انا لسا صغيره .. يقولى ا.ب.د.ااااا العبايه دى تلبسيها حتى قدام أمى
هدى : قليل الادب .. انا أمه .. وبعدين بتبص لحور .. انتى لسا مصممه انه جوزك ..😂😂
حور : جوزى .. وقلبى وروحى . ياما دلعنى ياما
هدى : طيب انزلى عشان تفطرى ..
حور : لا لايمكن .. انزل كدا .. اول ما العبايه تنشف ها البسها وانزل
هدى : براحتك وسابتها ونزلت ..
حور : واقفه فى وسط الاوضه ولفت نظرها انها اوضة طارق .. فتحت الدرج الا فى المكتب لقت البوم صور له هو واحمد وكريم .. الالبوم كله يضحك .. والصور جميله .. وبعدين صوارهم وهما فى كلية الشرطه .. حطت ايديها على الصور وبتمشى ايديها على وش طارق وسرحت شويه .. فاقت من شرودها وراحت على الدولاب فتحته وبتتفرج على هدومه وبتقلب فيها .. ومستمتعه جدا .. وبعدين راحت على التسريحه .. وبتشم برفانته كلها وبتشوف نوعهم ايه .. كل حاجه عنده مميزه وذوقه راقى جدا .. وعلى مستوى ..
*********************
طارق : نايم على الكرسى ورافع رجله على كرسى تانى ..
أحمد : بينشف راسه .. وبيزق طارق فوق كدا .. كريم زمانه جايب الفطار وجاااى
طارق : بنوم .. سبنى شويه
أحمد : فوق يابنى .. انت الساعه 11 .. خلينا نشوف ها نعمل ايه مفيش وقت للراحه .. وكريم دخل ومعاه سندوتشات .. وطارق قام اتوضى وصلى .. وقعد يفطر .. وقعدو التلاته قدام الشاشه الا بيراقبو منها .. عشان بعد وقت يبدئو يتحركو .. ويشوفو كريم ها يدخل وسطهم ازاى هو واحمد وطارق يستمر فى المراقبه … لانهم باليل ما ظهروش فى المخزن خالص

احد افراد العصابه : واد يا بوئى .. بوئى .. .
كريم : هههه الحق بينادى على بوئه
أحمد : ههههه .. شكله عامل دماااغ .. وهربانه منه ..
احد افراد العصابه : واد يا أسفوخس انت يالا
طارق : أسفوخس على دى عصابه من اول بوئها .. لحد سنجه ومضارب …
أحمد : 😂😂😂 نسى شمه واوبح .. هو راح فين
أسفوخس : ايوا يا سرنجه هو احنا ما ورناااش غيرك
انت ومحلول ..
طارق : احنا فين هنا … مستشفى التعافى من الادمان …
احمد : إدينى الحقنه بسرعه
كريم : ها تاخدها فى محلول .. والا أفضيها فى بوئك ههههههه واخلى اوبح يشيلك
طارق : اوبح يشيلهم كلهم .. وسرنجه يقوم بالواجب ..
سرنجه : جهز الواد اوبح ومضارب وبوئى وشمه عشان لازم نعمل طالعه انهارده ..
اسفوخس : طيب مش نعرف مين الا كان بيتجسس علينا امبارح لنروح فى داهيه
سرنجه : مالحقش يابنى .. احنا فى الامان
اسفوخس : الطالعه منين انهارده مأمنين على حد
سرنجه : لا مش مأمنين .. ها ننزل عند ال…… وهناك نصتاد
اسفوخس : ماشى .. ها أكد على الرجاله تجهز نفسها .. على اخر النهار
بعد مرور الوقت وبدأت الشمس فى الغروب
مؤمن : ياله جهزتو كل حاجه
نور : كله تماما .. ياله يا هانى نزل الشنط انت وهيدى
هيدى : ما هو ينزلها
هانى : بيزقها ليه ان شاء الله اتكسحتى شيلى معايا
مؤمن : مسك هانى من قفاااه .. وبيهزه جااامد .. يابنى لم لسانك .. وخلى عندك دم
هانى : ماهى الا مستفزه .. اد الحيطه وعايزانى اشيل لوحدى ..
مؤمن : ادله بالرجل .. وطلع يجرى وراه .. يا مفور دمى .. انت ايه يالا لسانك المبرد دا جايبه منين .
هانى : خلقة ربنا .. اعملكم ايه يعنى .. وواقف فوق الكنبه
نور : ابوس ايديكم انتو الاتنين .. ياله كفايه خناق .. وشالت شبشب من الارض ورشقته فى راس هانى
هانى : اه .. انتى بتنشنى .. طب اضربيها هى .. المدلعه الا ملهاش لازمه دى
مؤمن : نزل هانى ..وماسكه من قفاه .. قدامى شيل الشنطه دى ..
نور : اتفضلى شيلى الشنطه دى انا وبابا ها ننزل الباقى .. خلينا كدا كل نفس نعمل عليه فلم ومشكله ونزلو ركبو العربيه .. واتحركووو
مؤمن : بابا بيتصل عليا ..
نور : خير .. رد عليه ليكون فى حاجه مش طبيعته يعنى
مؤمن : الله يسلمك يا حج … ايه .. ليه طيب .. اهدى ملوش لازمه الغلط .. انا مسافر اجازه انا والولاد نغير جو .. لازم يا بابا .. حاضر اهدى طيب
نور : فى ايه
مؤمن : ابوكى وابويا ماسكين فى بعض ومبهدلين الدنيا ..
نور : دا وقته يعنى .. هما مش ها يعقلو بقى
مؤمن : احنا لازم نسافر لهم الموضوع كبير وضربو بعض
هانى : يعنى مش ها نروح الغردقه … احنا مالنا احنا
نور : ها نعمل ايه يعنى نسيبهم يعملو حاجه فى بعض عشان تتفسح .. تتعوض مره تانيه
هيدى : ياماما .. احنا ما صدقنا بابا خد اجازه .. والله حرام كدا .. هما الكبار الا بيحلو مشاكل الصغيرين والا الصغيرين الا بيحلو مشاكل الكبار ..
نور : خلاص انت وهى .. ربنا يحلها على طول ونسافر يومين بابا واخد اسبوع اجازه ..
مؤمن : بزعل بيسوق وبيفكر امتى يخلص وينتهى من كل المشاكل دى ضغط نفسى وقرف ومأثر مع ولاده
***********************
احمد وكريم بعد ما نفذو خطتهم الا ها تدخلهم وسط المجرمين خاطفى الاطفال
المعلم : تبع مين انت وهو ياد ..
احمد : احنا مش تبع حد يا معلم .. احنا شغل حر
المعلم : حر دا عند امك .. مش هنا .. الا ايده تتمد على حاجه مش بتاعته نقطعهالو
كريم : يا معلم .. احنا لقينا لنا كبير وقولنا لا
المعلم : وبتصرفو بضاعتكم ازاى .. بتسرحو بيهم والا بتبيعو على طول
أحمد : يا معلم .. احنا ما بنسرحش .. بنبيع على طول .. واحد اجنبى اتفق معانا وادينا بنجرب
المعلم : وبتاخدو كام فى الحته ..
كريم : 20 الف
المعلم : بيضحكو عليكو .. واجنبى طلع بيفهم اكتر منكو .. فين الاخضر
احمد : دا لسا اول عمليه لينا يا معلم ..
المعلم : لساك غشيم .. والشغلانه دى عايزا المفتحين وقت اللزوم والعبيط بردة وقت اللزوم ..
كريم : يعنى ها تشغلنا يا معلم معاك .. والا ها نفضل كدا بطولنا ينضحك علينا ..
المعلم : هو الشغل بالساهل كدا .. مش لازم يبقى ملفكو عندى .. سوابق .. نضاف .. تبع حد وبتشتغلونى ..
احمد : احنا ولا سابقه واحده ولا تبع حد يا معلم .. واتاكد براحتك ..
اسفوخس : العيال دى ايديها حلوه يا سيد المعلمين .. لولا احنا اتدخلنا .. كان زمانهم شاقطين الواد وكاتو ..
المعلم : اساميكو ايه
أحمد : انا سيد وهو كرم
اسفوخس : ايه الاسامى الهشتك بشتك دى ياد انت وهو ..
احمد : بينه وبين نفسه .. هشتك بشتك ..اسفوخس عليك والف اسفوخس .. هههههههه
كريم : عايزنا نغيره .. نغيره ..
المعلم : محدش بيشتغل بأسمه ياغشيم منك له .. شهرتك ايه انت وهو ..
كريم : ملناش يا معلم ..
اسفوخس : بيشاور على احمد .. دا ملقاط .. ايده ايه فله سحب الواد من البت وسابه اول ما لمحنا .. ودا بقى
كريم : ايه حواجبه ..
المعلم : حلوووه ياد .. لا انت الحنين .. يا حنين
كريم واحمد بيضحكو ضحك مصطنع .. واسفوخس والمعلم بيضحكو برزلاه
************************
طارق : بيتواصل معاهم .. ايه الاخبار
احمد : بصوت واطى .. كله تمام .. ها ندرس المكان كويس قوى .. عشان لو بيعملو اى حاجه تانيه ونشوف بيودو الاطفال فين وبيتعاملو مع مين . وها ابلغك
القائد : ركزو .. وما تحاواش تتكلم لو فى خطر عليكم فاهم .. بكرا بالكتير قوى كل قرارهم يبقى عندى
احمد : تمام يا فندم .. لما ادى الاشاره الاولى .. يبقى فى استعداد .. والاشاره التانيه بالهجوم على كل الاماكن الا ها ابلغ عنها ..
طارق : تمام .. احنا على اتم الاستعداد .. وجاهزين فى اى وقت تدينا الاشاره فيه .. وقفل معاه
******************
مؤمن ونور وصلو بعد وقت عند اهلهم .. وقاعدين والدنيا شايطه على الاخر …
نور : يا بابا اهدى ماينفعش كدا .. انتو اخوات .
والدها : اخوات ايه وزفت ايه .. اخويا ياكل حقى ومدوخنى بقالى سنين .. واخرتها يمد ايده عليه
والد مؤمن : واكسر دماغك كمان .. انا اخوك الكبير يا جزمه .. وانت راجل ما بتفهمش .. دا حقى كل دا حقى مين الا اشتغل مع ابوه .. مش انا .
مؤمن : هو معنى انك اشتغلت مع ابوك يبقى دا حقك .. حرام يا بابا كدا .. الشغل دا كنت بتاخد اجرته .. ودا ميراث .. حق ربنا ولازم يتقسم بشرع ربنا .. انت ياما صرفت وعملت كل الا نفسك فيه فى حياة جدى .. خدت حقك تالت و متلت ..
والد نور : قوله .. الا الجشع ملى قلبه . عايز يكوش على الدنيا ..عمرك ما ها تشبع .. ياما الناس حذرتنى منك وقالتلى اخوك ها ياكلك .. اخوك ما يستهلش .. ياريتنى سمعت كلامهم ..
والد مؤمن : وانا ياما قالولى عليك .. ها ينسى تعبك وشائك مع ابوك ويجى يقسم زيك زيه . ناس تتعب وناس تشيل على الجاهز .. بيزق مؤمن انت معايا والا معاه .. هو عشان ضحك عليك هو وبنته بتبيع ابوك
مؤمن : ماتدخلش نور فى النص .. الحق حق . ربنا ها يسئلك عليه .. انت بتقول انك تعبت .. مش لوحدك .. انا شغال فى شركه برا وبتعب فيها وباخد أجر حق تعبى .. ها اروح اقول لهم انا ليا فى الشركه انا الا اتعبت فيها .. انت اشتغلت وخدت حقك واجرك .. وياما جدى اشتكى منك وقال انه شايل الشغل لوحده .. جدى مات .. والا موجود دلوقتى ميراث .. يتقسم بشرع ربنا ..
نور : عمى ارجوك كفايه خلافات كفايه احنا تعبنا .. ها تقابلو ربنا ازاى وانتو كدا ها تقولو ايه
والد نور : ها اقوله انا واخويا خصوم .. اخويا استحل حقى وانا مش مسامحه ..
والد مؤمن : لسا ها يتكلم .. هانى وقف فى النص بينهم .. وبعلو صوته .. انا بكرهكم ..
كلهم سكتو وبصو على هانى .. والصدمه لجمتهم ..
هانى : بتبصولى ليه .. ايوا انا بكرهكم ..
مؤمن : قايم يضربه والد مؤمن مسكه .. وبيبص لهانى .. دى اخرتها .. بتكرهنا احنا ليه دا احنا بنحبك
هانى : انتو عايزنى احبكم وانتو ما بتحبوش بعض .. ليه .. على طول تشتمو ماما وبابا .. وكل ما تعملو حاجه فى بعض تقلبو عليهم .. ها تعملو ايه بالفلوس .. ها تموتو وها تسبوها لينا زى جدك وبيبص لابوه .. بس بعد ايه بعد ما كرهتونا فى بعضنا .. وبدال ما نبقى عيله بتحب وتود بعض ..لا ها نكره اى شئ يخصنا وبنتمنى الموت لكل واحد فينا . انتو اوحش ناس شوفتها فى حياتى .
مؤمن : فلت من ابوه وضرب هانى بالقلم . وبعلو صوته غور على برا ..
هانى : بعياط وعصبيه .. انت وماما خايفين تقولو لهم انكو زهقتو من مشاكلهم .. خايفين تقولو انكو مش عايزين منهم فلوس ولا ميراث .. وبيبص لهم كلهم وعيونه بتنزل دموع كتير .. بابا وماما ها يعلمكو الحب الحقيقى ياريتكو انتو كمان تحبو بعض وتبطلو تعكننو علينا حياتنا .. وخرج على برا نزل الشارع وقاعد على الباسطه بتاعت البيت .. هيدى نزلت قعدت جمبه وحضناه وبتعيط على عياطه
والد نور : حلو كدا يا اخويا .. هو دا مش حفيدى وحفيدك .. بدال ما نلعب معاهم ونتمتع بيهم ويشوفنا قدوتهم .. بقو بيكرهونا .. وبيكرهو اليوم الا شافونا فيه
والد مؤمن : انت السبب مش روحت لابن عمك وبتقوله انا مش ها اخليه يتهنى على قرش .. وها اذله لما اجوز بنتى لابنه واخلى نور تضحك على مؤمن
والد نور : ما حصلش .. وجاب المصحف .. وحلف عليه .. والله ما حصل كداب وهاته وانا اجيب الجزمه اضربه بيها قدامك لو قال غير كدا .. انا يابنتى عمرى قسيتك على جوزك والا قولتلك خدى منه حاجه
نور : لا ما حصلش وانا ومؤمن خرجنا نفسنا وحياتنا برا كل دا .. ياعمى مؤمن قبل ما يكون ابن عمى هو حبيبى الا بتمنى له الرضا يرضى
مؤمن : لو الا ها يريحكم انتو الاتنين اننا تنازل عن كل حاجه تخصنا فيكو ها نتنازل وها نفضل نودكم ونزوركم .. انا كرهت اليوم الا جدى مات فيه وساب لكم فلوس .. كان ساب ليكم الضهر والسند والاخوه .. احسن من الفلوس والكره والحقد الا دخل بينكم ..
والد مؤمن : انا بحبه .. وعايز الا بينا يخلص .. وياما وصلنى انه بيغلط فيا
والد نور : وانا كمان .. نفسى ترجع اخوايا بتاع زمان وتحبنى .. وبردو ياما وصلنى انك بتكرهنى
مؤمن : ايه المانع .. بيبص لابوه .. ها ترضى بحكم الازهر هو الا يفصل بينك وبين اخوك فى موضوع الميراث .. ومفيش اى حد يتدخل بينكم تانى .. عمرهم ما بيحلو بيزودو على الكلمه عشره والموضوع يكبر
والد مؤمن : ها ارضى .. مش عايز احفادى يكرهونى ويقولو عليا انى وحش وباكل حق اخويا زى ما بتقولو
مؤمن : راضى ياعمى ..
والد نور : راضى يابنى .. كل أمر الله انا راضى بيه فين الولاد
نور : بتعيط .. وحضنت مؤمن
مؤمن : ضمها جااامد .. خلاص يا نور .. ربنا يهديهم
نور : هات الولاد يا مؤمن .. الولاد مقهوره ..
مؤمن : سابها ونزل يدور عليهم . لاقهم قاعدين بيعيطو .. حضنهم .. وقرب هانى ومسك وشه وبيمسح دموعه .. حقك عليا يا حبيبى .. كلامك جرئ ويزعل يا هانى .. عيب دا جدك ودا جدك .. عيب
هانى : انا زعلان منهم يا بابا .. امتى ها نعيش فى امان من غير خناق
مؤمن : قريب ان شاء الله يا حبيبى .. خلاص ها نصالحهم ان شاء الله .. تعالى ياله اعتذر ليهم .. عرفهم انك بتحبهم وخد هانى وطلع لهم فوووق
*************************
مروان لم عيلته ماعدا ميرنا الا رفضت تروح وخدت سمسمه .. والباقى كله راح لشريف .. دخلو واتصدمو من منظر شريف وهدى .. وخصوصا شريف باين عليه التعب وقلة النوم .. قعدو كلهم جوا الفيلا ..
مازن بيبص يمين وشمال : هى فين يالا
شريف ساند على كتف مازن وبينام وبيشاور بتقل .. فوووق الهى ما تنزل 😂😂😂
مروان : هدى اطلعى ناديها عشان اقعد معاها يمكن نوصل لحاجه
هدى بتسرع وماسكه دماغها : لا سيبها الله يخليك
روان : 😂😂😂😂 ياعينى للدرجه دى
شريف وصوته طالع بالعافيه : وأكتر .. انتى كنتى بلسم وانتى قمر
مازن : 😂😂😂 هى وصلت لقمر
روكا : انتو حالتكم صعبه قوووى يعينى .. وبصو كلهم للسلم لقو حور نازله جررررى
حور بعلو صوتها : حماااتى مش تقولى ان عندك ضيووووف .. دا طروقه ها يزعل منى وياخد على خاطره عشان مارحبتش بيهم
شريف : ابوووس ايدك كفايه ترحيب هما مش عايزين حد يرحب بيهم
حور : لا يا حمايا اوعى تقول كدا وحطت ايديها على الترابيزه يالهوووى تراب .. وشهقت جااامد دا طروقه بيحب النضافه يا فضحتى وجريت من قدامهم ..
كلهم بيبصو لبعض وانفجرو فى الضحك
مازن حط ايده وبيمسح الترابيزه بايده وعمال يبص عليها وبصوت عالى فين ام التراب فين دا مخها الا مترب شكله
مروان : دى مش طبيعيه يا شريف
شريف بعياط ومصطنع وبيمسك فى مازن اكتر : انا تعبت انقذونى ياناس وبيقلد روان منه له .. وكلهم تنحو لما شافو حور جايبه فوطه حاطها على كتفها والجردل والشرشوبه ورابطه العبايه على وسطها ولابسه بنطلون البجامه والطرحه على شكل فيونكه على راسها
هدى : رفعت ايديها لاء كفايه يا حور كفايه
حور ماسكه الفوطه وتيجى جمب كل واحد وتنفض : ابدا يا حماتى الضيوف تقول ايه مرات طارق مش نضيفه
روكا : ودى تيجى .. امسحى امسحى ربنا يعينك
روان : اساعدك يا حبيبتى
حور بصوت عاااالى : عسل يا نااااااس .. وبتبص لمروان مراتك دى يا استاذ اصلك مكلبش فيها زى ما طارق بيكلبش فيا وبتضحك 😂😂😂😂
مروان بيضحك : ايوا مراتى شكله بيحبك طارق وانتى بتحبيه
حور : ياسلام دا احلى حب بيجمع وبيرفرف فى كل حته فى البيت وبتشاور بايدها عليهم وتقرب على كل واحد هنا .. وهنا .. وبتقرب على مازن وهنا
مازن بيهز راسه ومتنح : لا هنا محجوز لروكا امشى يخربيتك دا انتى مورستان
حور : بتمسح وبدات تقوم كل واحد فيهم من مكانه وكل ما يروحو فى حته تقوهم وتمسح مكانها
شريف : كفايه نضفت وربنا نضفت
حور : لا يا حمايا عشان الدبان والحشرات المتنقله قوم .. قوم .. وزهقتهم طول القاعده وجننتهم وطلعت عنيهم
*********************
أحمد : وانت أسمك سرنجه ليه بقى
سرنجه : عشان محسوبك الا بكيفهم .. واى عيل بيجى وها نسرح بيه .. بديله حقنه تنيمه يومين تلاته .. والبت الا ها تسرح بيه تنيمه وتغطى وشه عشان محدش يعرفه وعشان هو ما يزنش ويفضحنا على شوية مكركرو وكام كيس من بتوع الدم .. وتلم احلى لم
كريم : سابكينها انتو يا قرود .. وشمه بيشممهم ايه بقى
سرنجه : لا الواد شمه دا مدمن شم .. بيشملك أى حد يعرف ابن وزير والا ابن غفير .. عفريت وشمام درجه اولى
أحمد : انت ها تقولى من ساعة ما جينا هو عمال يحوم حوالينا زى الكلبه البلدى .. ونازل شم
كريم : 😂إلا اوبح .. مصمم يشلنى .. وانا اقوله ابدا .. يقولى دى التحيه ..بتاعتنا
سرنجه : بس انتو ايه لقطو كل دول فى ثانيه .. صدق لما قال عليك ملقاط .. وانت الحنين
احمد : لازم نبقى مفتحين يا سرنجه .. والا ها نضيع
سرنجه : دايما اسفوخس يقولى فتح عينك يا سرنجه واضرب الحقنه فى العضل ..
كريم : اه ايه حكاية اسفوخس بقى
سرنجه : دا ياسيدى .. مابيشوفش حاجه غير لما يقول اسفوخس .. يعمل كل عمليه .. وبعد ما يخلصها يقولك اسفوخس على دى عمليه ..
كريم : اسفوخس على دا راجل نتن .. دا ريحته جايبه لاخر الشارع ..
سرنجه : 😂 شمه كل ما يشوفه يقوله اسفوخس عليك وعلى ريحتك
*******
طارق : قاعد ومراقب الوضع كله .. وبيسمع كل كلمه .. وبيسجل للمعلم بتاعهم ..
العقيد حاتم : ايه الاخبار يا طارق
طارق : لحد دلوقتى تمام وماحدش شك فى كريم واحمد … ها نتحرك امتى .. اول ما نفهم التعامل مع مين بالظبط .. والاطفال دى كلها بيشحتو بيها بس والا وراهم حاجه تانيه
حاتم : وراهم كتير .. طبعا … دا شغل كبير وفى ناس مهمه متورطه مع الناس دى ومعنى انه بيقول لاحمد ان بينضحك عليهم وفين الاخضر .. يبقى ليهم شغل خارجى ..
طارق : ايوا فعلا .. بص يا فندم على الشاشه كدا .. ها تلاقى .. المعلم جمال كل فتره يدخل الاوضه الا فى الزاويه اليمين هناك .. ويقفل على نفسه .. لازم اتواصل مع احمد او كريم يشوفو ايه حكاية الاوضه دى كمان
حاتم : بيشاور على الشاشه .. كريم بيستخبى وداخل وراه .. هو خد باله .. كويس قوى . الا بيعحبنى فيكو انتو التلاته فى اى عمليه عينكم على كل حاجه وقوة التركيز عندكم هايله لو قاعدين بتكلمو 10 رجاله .. ربنا يحميكو
طارق : يارب يا فندم وبعدين انتبه للشاشه تانى .. ولقى كريم طلع من الاوضه وبيقفلها وبيخبى سونكى فى جمبه .. وجهاز التواصل بينهم بدء يرن لطارق
كريم : بصوت هااامس .. لازم يبقى فى تحرك فورى
طارق : فى ايه والا ايه غير خطتنا كدا هى الاوضه دى فيها ايه
كريم : فيها مصيبه

*********************
إلي هنا ينتهي الفصل الثانى والعشرون من رواية خادمتى ولكن الجزء الثانى بقلم لولو طارق
تابع من هنا: جميع فصول رواية خادمتى ولكن الجزء الثانى بقلم لولو طارق
تابع من هنا: جميع فصول رواية إغتيال بقلم وردة

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق