غير مصنف

رواية الفريسة والصياد – منال سالم – الفصل العشرون

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية مصرية جديدة للكاتبة المتألقة منال محمد سالم نقدمها علي موقعنا قصص 26  وموعدنا اليوم مع الفصل العشرون من رواية الفريسة والصياد بقلم منال سالم 

رواية الفريسة والصياد بقلم منال سالم – الفصل العشرون

تابع أيضا: قصص رومانسية

رواية الفريسة والصياد - منال سالم
رواية الفريسة والصياد – منال سالم

رواية الفريسة والصياد بقلم منال سالم – الفصل العشرون

في المشفى ،،،،
خارج غرفة يارا ،،،
كانت خالد يحاول أن يجد مبرراً لكلام يارا الجاف مع والده ، فأخبره أنها حزينة لأنها ستترك الفيلا حينما تتزوج فكان رد رأفت عليه هو..
-رأفت: والله لو بايدي كنت خليت حد فيكو يتجوزها ، سواء انت ولا أخوك ، بس أنا عارف ان يارا مش في دماغكو ، ولا انتو في دماغها
-خالد بدهشة : نعم حد فينا يتجوزها ؟؟؟
-رأفت: طبعاااا ، هو أنا هستخسر بنت أخويا في واحد من ولادي ، بس أنا عارفكوا ، مش البنت اللي تجذبكوا ليها
-خالد: هه
-رأفت: ربنا يصلح حالها وحالكوا ، وهنعمل ايه بس ، دي سنة الحياة ، لكن ان شاء الله اللي هيتجوزها لازم أكون واثق فيه مليون % انه هيحافظ عليها ، وطبعاً هتكون دي مهمتك يا خالد انك تسأل عنه وتجيبلنا أراره ، واخوك ادهم برضوه اهو لو كان عضو في النادي بتاعنا يبقى يسألنا عليه ويعرفلنا علاقته مع الناس ايه
-خالد: كمان
-رأفت: طبعااااا ، ما انتو هتبقوا زي اخواتها وتقفوا معاها
-خالد: هه.. ربنا يسهل

-رأفت في نفسه : يا رب حد فيكو يتنحرر والكلام ده يأثر فيكو ، لكن أعمل ايه شايف واحد عامل زي الجبل مافيش بنت بتأثر فيه ، والتاني عاملي فيها كازانوفا وكل البنات بتجري عليه … ده أنا لو مكان يارا مابصش لخلقتكم ، بس انا مستخسرها تروح للغريب وأنا عندي شحوطة زيكم كده !!!!

…………….

في داخل الغرفة ،،،،
-جاسر: الدكتور قال انك تقدري تخرجي
-يارا: الحمدلله، أنا أصلاً مش بحب أعدة المستشفيات
-عمر: ولا أنا
-ناهد: طيب لو كده ، نمشي كلنا الوقتي
-رأفت وقد دلف للغرفة : أنا عاوزك يا يارا يا بنتي تطمني ، وطول ما أنا عايش ماتشليش هم أي حاجة ، انتي في عينيا وعينين اخواتك خالد وأدهم وعمر
-أدهم باستغراب : اخواتها ؟؟؟
-عمر: نعم ، أخوها ؟؟؟
-جاسر بابتسامة : اكييييد طبعا يا عمي ، هي هتلاقي اخوات زيهم فين ؟؟؟
-أدهم: نقطنا بسكاتك دلوقتي يا جاسر
-جاسر بخبث: ماشي يا أخويا
-عمر في نفسه: أل أخوها أل .. ده أنا لو اطول ابقى جوزها هبقى ايييييييه سلطان زماني ، يا سلااااام
-رأفت: دول هما يا بنتي اللي هيقفوا معاكي يوم ما نفرح بيكي ونجوزك لحد يستاهلك ، اخواتك دول هيساعدوكي ومش هيسبوكي لوحدك إلا لما نسلمك لعريس الهنا وساعتها هخليكي تسيبي الفيلا وأنا مطمن
-يارا: ان شاء الله ، ده يوم المنى لما أنا اسيب الفيلا وأنجو ببدني
-أدهم: اسلمها لعريسها ؟؟؟
-عمر: ده أنا ايدي تتقطع قبل ما أعلم كده ، أل عريسها أل !!
-رأفت: يالا يا يارا يا حبيبتي عشان تركبي معايا العربية
-يارا: ماشي يا عمي
-جاسر: واحنا هنركب مع أخواتك
-أدهم: استغفر الله العظيم يا رب ، جاسر !
-جاسر: نعم ؟
-أدهم: خف عشان تعوووم ، ماشي ؟؟؟

ركبت يارا مع عمها في سيارته ومعهم عمر ، بينما ركب جاسر ووالدته ناهد مع ادهم في سيارته ، ثم لحق بهم خالد في سيارته ، وتوجه الجميع عائدين إلى الفيلا
………………….

في فيلا رأفت الصياد ،،،،
كانت غرفة يارا تحت الاصلاح كما يُقال ، وكانت شاهي غاضبة لأن المياة أفسدت ملابسها الغالية التي كانت موضوعة في الحقيبة الموضوعة على الأرض و..
-شاهي: اوووف ، هدومي باظت يا أنطي بسبب اللي حصل
-فريدة: ولا يهمك يا شوشو ، هاجيبلك غيرها يا حبيبتي ، أنا اللي حارق دمي ان عفشي اتبهدل ، والسجاد باظ
-شاهي: والله يا أنطي فيروو أنا مكونتش اقصد اني أبوظ الدنيا ، انا كنت عاوزة أربي الزفتة دي
-فريدة: أنا عارفة يا حبيبتي ، هي آوس البلاوي في كل حاجة تحصل
……………..
في سيارة خالد ،،،،
كان خالد يفكر فيما قاله والده و…
-خالد: تتجوز حد من برا العيلة ، طبعا مش هيحصل !! أنا لازم أخلي يارا تشوفني فتى احلامها ، لازم تحبني أنا زي ما أنا بحبها .. يارا مش هتكون لحد تاني إلا أنا !!!
…………….

في سيارة أدهم ،،،،
كان ادهم وجاسر يفكران فيما قاله رأفت عن نيته لتزويج يارا من شخص ما يثق فيه و…
-أدهم في نفسه: يقصد ايه بابا بكلامه اننا اخوات ليارا ؟؟؟ لأ وكمان عاوزني أقف معاها لحد ما أسلمها لعريس الغفلة !! ده مش هيحصل أبدااااااا

-جاسر في نفسه: ياااااه ، احلى كلام عمي قاله النهاردة ، اييييه .. كده الواحد يبقى عنده فرصة انه يقرب من يارا بدون مايشيل هم ان أدهم ولا خالد عينيهم عليها ..

……..
وصل الجميع إلى الفيلا و…
-رأفت: حمدلله ع سلامتك يا يارا ، وابقى خلي بالك بعد كده ، في سباكين هما اللي بيعملوا ده ، ايديكي الحلوة دي ماتبهدليهاش تاني
-يارا: ربنا يسهل
-عمر: ايوه ، اللي زيك يا يارا المفروض تعقد زي الملكة والكل يخدمها
-يارا: ربنا يخليك ليا يا عمر
-عمر بعشم: ومايحرمنيش منك ابدااااا يا يارا

-فريدة: اوووف
-رأفت: مش هاتقولي حمدلله ع سلامة يارا يا فريدة
-فريدة: ماهي زي القطط أهي بسبع أرواح مابيجرالهاش حاجة
-يارا: الله أكبر يا خالتي ، الحمدلله ، في ناس بتبقى واقفة في مكانها زي حضرتك كده وفجأة تطب ساكتة يجيلها شلل رباعي ولا جلطة في المخ أي حاجة يعني
-فريدة: قصدك ايه ؟؟؟؟؟
-يارا: آآ…
-رأفت مقاطعاً: لا تقصد ولا متقصدش ، مش وقته بقى ، اطلعي على أوضتك يا يارا عشان ترتاحي
-فريدة: لأ مش هينفع تطلع
-رأفت: ليه ؟
-فريدة: العمال شغالين فوق ، وانا خدت حاجت شاهي عندي في الأوضة ، أه وهشتريلها حاجات جديدة بدل اللي اتبهدلت من المياه
-يارا: طب وانا ؟؟؟
-فريدة: معرفش
-رأفت: هو ايه اللي متعرفيش ؟؟؟ عاوزة البنت تبات فين ؟؟؟
-يارا: خلاص يا عمي مش مشكلة
-رأفت: لأ مشكلة طبعا
-عمر: خلاص يا بابا يارا هتنام عندي في اوضتي
-يارا: مافيش داعي يا عمر
-عمر: والله ما يحصل أبداً
-يارا: طب وانت هتنام فين يا عمر لما أنا أنام في أوضتك ؟؟
-عمر: ودي محتاجة سؤال ، طبعاااااا جمبك ع السرير
-رأفت: ولد !!!
-عمر: ايه يا بابا ، مش انت قولت أنا زي أخوها ، يبقى ننام عادي جمب بعض ، ده أنا حتى نومي خفيف ومش بعمل صوت وآآآ
-أدهم مقاطعاً: انت هتقولي ، الزفت ده هينام في اوضتي ، وخلي يارا لوحدها ترتاح
-جاسر: أنا شايف كده برضوه

وبالفعل صعد الجميع إلى غرفهم ، وحل المساء وكانت الجواء في الفيلا هادئة ، طرق عمر باب غرفته ليطلب من يارا أن تنزل وتجلس مع الجميع في غرفة المعيشة ولكنها رفضت و..
-عمر: ماتيجي يا يارا تقعدي معانا تحت
-يارا: لأ ، أنا مبسوطة كده
-عمر: يا بنتي كلهم اعدين تحت بيتفرجوا ع فيلم يا بيلعبوا
-يارا: ماليش مزاج والله
-عمر: طب ايه رأيك نلعب دور بلاي ستيشن
-يارا: بس انت مش شايف كتفي عامل ازاي ؟؟
-عمر: مممم.. طيب هنلعب سباق ماشي ؟؟ أمانة عليكي يا شيخة ماترفضي
-يارا: اوك عشان خاطرك بس
-عمر: ربنا يجبر بخاطرك زي ما بتجبري دايما بخاطري

……………
في غرفة المعيشة ،،،،
-شاهي: الفيلم تحفة يا أدهم
-أدهم: هه
-شاهي: ايه يا ادهم سرحان في ايه ؟؟؟
-أدهم: مافيش ، اومال فين فرقع لوز ؟؟
-شاهي: معرفش ، يمكن بيجيب حاجة من تحت
-ادهم: اها
……..
-فريدة: تمام ، أنا عزمت أصحابنا في النادي
-ناهد: اها ، وانا هعزم برضوه جيرانا
-فريدة: اوك ، بس بلاش الست اللوكال دي اللي اسمها جيهان
-ناهد: ليه دي كويسة وانسانة محترمة
-فريدة: لالالالا ، دي بيئة ، انتي ماشوفتيش بتلبس ازاي ، ياااي ، حاجة تقرف
-ناهد: انتي زي ما انتي يا فريدة
…….
-خالد: أنا حجزت التورتة والجاتوهات
-جاسر: وانا ظبطت العشاء خلاص
-خالد: مأساة كل سنة بتكررر
-جاسر: أه والله ، نفسي نرتاح بقى ويلغوا حكاية العيد ميلادات دي
-خالد: بتبقى ابتلاء
-جاسر: جداااااا

-رأفت: اومال فين يارا ؟؟ محدش نادلها تيجي تقعد معانا
-فريدة: احنا مبسوطين كده يا رأفت ، مش ناقصين عكننة
-رأفت: مبسوطين ايه بس ، البنت هتفضل أعدة كده لوحدها
-فريدة: يعني انت مش بترتاح غير لما تلاقي البت دي معصباني ومخرجاني عن شعوري
-ناهد: والله يا فريدة دي طيبة ، وفي حالها ، انتي بس ادي نفسك فرصة تتعرفي عليها وآآآ…
-فريدة مقاطعة : لأ مش عاوزة
-جاسر: انا هاروح أناديها يا عمي
-رأفت: ربنا يكرمك يا جاسر يا بني ، ويرزقك ببنت الحلال اللي زيك
-جاسر بفرحة : ربنا يخليك يا رب

وما إن خرج جاسر من الغرفة ، حتى نهض أدهم من مكانه و…
-شاهي: انت رايح فين يا أدهم ؟؟
-أدهم: هاطلع التويلت وجاي
-شاهي: أوك

………….
في غرفة عمر ،،،،
وجد جاسر يارا تجلس بصحبة عمر يلعبان سويا بالبلاي ستيشن و…
-عمر: وبتقوليلي ايدك تعبانة ومش قادرة ، ده انتي كسحتيني
-يارا: عارف لما بكون في الفورما آآآآ….
-جاسر مقاطعاً: مساء الخير
-يارا: مساء النور
-جاسر: بقولك ، عمك رأفت عاوزك تنزلي تقعدي معانا تحت
-يارا: لأ أنا مش عاوزة
-جاسر: ليه بس
-عمر : يا جاسر احنا مبسوطين هنا ، بنلعب ومروقين ع نفسنا مش ناقصة البونية تسمع كلمة بايخة من حد
-جاسر: أها
-يارا: معلش اعتذرله بالنيابة عني
-عمر: يالا يا يارا ، أنا هلعب الدور ده بجون سينا
-يارا: لأ ده بتاعي
-جاسر مستفهماً: انتو بتلعبوا ايه ؟؟
-عمر: مصارعة حرة
-جاسر: ممم.. طب كويس ، ومين الكسبان ؟؟
-عمر: طبعاااا يارا ، هي دي محتاجة سؤال
-جاسر: لا والله ، أد كده انتي ممتازة في اللعب ؟؟
-عمر: يا عم دي محترفة
-يارا: لا والله ، ده أنا لسه بقول يا هادي
-جاسر: طب ينفع أجرب حظي معاكس
-يارا: أها ، والله شوف عمر لو موافق اوك
-عمر: تعالى مكاني وجرب حظك
-جاسر: اها ، ربنا كريم
-عمر: انا هاقفل الباب عشان الدوشة ، مش ناقصين حد يتكلم
-يارا: اوك

وبدأ جاسر اللعب مع يارا ، ثم صعد أدهم إلى الطابق العلوي وبحث عن جاسر في غرفة عمر فوجد أن باب الغرفة مغلق ، فاقترب بهدوء و…
-يارا: ههههههههههه لألألأ ده انت طلعت مش سهل خالص
-جاسر: لا والله ، ده انتي فهماني غلط
-يارا: غلبتني في الجولة الأولى وتقولي مش عارف ألعب
-جاسر: ده لسه اللعب شغال
-عمر: عاوزك تخربها ع الأخر ، يالا يا جاسر .. هاااا اشتغل كده
-يارا: لأ بقى ، انا كده مش هاكست
-عمر: انا عاوزك تطلعي اللي جوايا ، ورينا المستخبي يا مزة

-ادهم في نفسه خارج الغرفة : هما بيتكلموا عن ايه بالظبط ؟؟؟ مستخبي ايه اللي عاوزين يشوفوه ؟؟

-جاسر: حاسبي ، انتي كده بتضربي تحت الحزام
-يارا: أنا برضوه ولا انت اللي بتدي من تحت لتحت

-أدهم من الخارج : نعم ؟؟؟ تحت الحزام ومن تحت لتحت ؟؟؟

-عمر بصوت مرتفع: ايوه يا جاسر ، ازنؤها ، ازنؤها أكترررر
-ادهم في الخارج : يزنؤها ؟؟؟؟؟
-يارا بصريخ : لألألألأ.. احنا ماتفقناش ع كده

-ادهم: هو في أكتر من كده ؟؟؟

ثم فتح أدهم باب الغرفة بقوة ليصطدم الجميع برؤيته و…
-جاسر: في ايه يا أدهم ؟؟؟
-يارا: خير
-عمر: نعم يا أدهم ؟؟ انت عاوز حاجة
-ادهم باحراج : احم.. آآآ.. أنا .. أنا كنت جاي .. آآآ… اشوف انت بتزنؤها ..قصدي آآآ.. انتو ماجتوش تحت ليه
-جاسر: بلعب مع يارا ، مش فاضي
-عمر: وأنا مستني دوري بعده
-يارا: في حاجة تانية
-ادهم: هو انتو بتلعبوا ايه ؟؟ طب ما تاخدوا البلاي ستيشن بتاعي ؟؟ ده حتى أحدث من ده
-يارا: ده كويس وشغال
-أدهم: لأ استنوا أنا هاجيب بتاعي ونلعب كلنا سوا
-عمر: لأ أحنا كده كويسين
-أدهم: أسكت يالــه .. أنا هاجيبه وجاي
-عمر: دايما حاشر نفسه معانا
-جاسر: خلاص سيبوه ياخد فرصته
-عمر: طيب
-يارا بضيق: اووف، ماشي مع اني مش حباة يلعب معانا
-جاسر بتحدي : خلينا نعلمه اللعب اللي على أصوله ماشي ازاي
-عمر: اشطااا
………………..
في غرفة المعيشة ،،،
-خالد في نفسه: هو الكل بيطلع فوق ومش بينزل ليه ؟؟ أكيد في حاجة فوق بتحصل ، أنا لازم اطلع أشوف في ايه

-رأفت: رايح فين يا خالد ؟؟
-خالد: هشوف حاجة في الأوضة عندي ونازل تاني
-رأفت بخبث: طيب .. متتأخرش
-خالد : اوك
………
-شاهي: هو ادهم بيعمل ايه كل ده تحت ؟؟ بيخترع الذرة ؟؟؟
-ناهد: ماتزهقيش أدهم يا شاهي
-شاهي: أزهقه ايه بس يا مامي ، هو أنا بلحق أقعد معاه
-ناهد: سيبيه ع راحته ، وهو هيجيلك ..
-شاهي: انا لو سبته ع راحته يبقى مش هيجي خالص !!
…….

في غرفة عمر ،،،
أحضر أدهم جهاز البلاي ستيشن الخاص به وأوصله بالتلفاز وبدأ يطالب بدوره في اللعب و..
-أدهم: دوري أنا مع يارا
-يارا: لأ
-أدهم : ليه بس ، ده انا حتى صاحب الجهاز
-عمر: عاوز تاخده براحتك ، بس احنا ماشيين بنظام الفرق
-ادهم: طب دوري هيجي امتى ؟؟
-يارا: لما جاسر يخلص الأول
-ادهم: يا مهون ، وطبعاً جاسر مش محتاج وصاية
-جاسر بغمزة : طبعااااا .. دي لعبتي
-أدهم: الظاهر ان اللعب معاك مش هيكون بالساهل
-جاسر: طبعااااا .. انا خصم مش سهل يا ادهم يا صياد !!
-أدهم: العبرة بالخواتيم !

ثم طرق خالد باب غرفة عمر و….
-خالد: مساء الخير
-ادهم: اهلا ، انت كمان شرفت
-جاسر: تعالى يا خالد
-خالد: انتو بتعملوا ايه ؟؟
-عمر: بنلعب مع يارا
-جاسر: تعالى جرب حظك .. ده المنافسة شرسة ع الأخر
-ادهم: انت هتقولي !!
-خالد: وماله ، أهو أخد فرصتي برضوه.. وأنا واثق اني هاكسب في الاخر ……….
في فيلا رأفت الصياد ،،،
في صباح اليوم التالي ،
استيقظ الجميع مبكراً وتجمعوا لتناول الإفطار سوياً في حديقة الفيلا ثم ..
-صباح: الفطار جاز يا بهوات
-رأفت: يالا يا جماعة ، عاوزين نفطر كلنا سوا
-خالد: حاضر يا بابا ، أنا أصلاً واخد اجازة من الشغل النهاردة
-فريدة: خير ما عملت ، خلينا نركز في حفلة عيد الميلاد
-ناهد: والله يا جماعة تعبتوا نفسكم
-فريدة وهي تربت على كتف شاهي : ماتقوليش كده ، دي شوشو أكتر من بنتي
-شاهي: ثانكس يا أنطي
-رأفت: اومال فين عمر ويارا ؟؟؟
-صباح: أنا بلغتهم ينزلوا للفطار وهما جايين
-رأفت: تمام ، وأدهم وجاسر ؟؟؟
-صباح: بلغتهم برضوه وهما كانوا جايين مع شاهي هانم
-فريدة: طب يالا هاتي الشاي يا صباح بسرعة ، ومتنسيش تأكدي ع الفندق يبعت طقم الـ servants
-صباح: حاضر يا هانم

………..
في غرفة عمر ،،،
كانت يارا تحاول أن تتجنب النزول والافطار مع العائلة ، وعمر يقنعها بالعكس و…
-عمر: يالا يا يارا عشان تفطري معانا
-يارا: والله الواحد مش عاوز يفطر تحت ، لأحسن يسمع كلمة كده ولا كده تسد نفسه
-عمر: معلش ، وبعدين لو ده حصل فانا موجود عشان أفتح نفسك
-يارا: تسلملي يا عمر
………
في حديقة الفيلا ،،،
اجتمع الجميع حول مائدة الافطار و…
-جاسر: بصراحة الجو جميل النهاردة
-رأفت: اه أوي
-فريدة: ده من حظ شوشو عشان عيد ميلادها
-شاهي: مامي أنا محتاجة فلوس عشان أشتري dress جديد بدل اللي نت الخـ…. احم.. بدل اللي باظ من المياه
-ناهد: ربنا يسهل
-شاهي: مامي بليز ، أنا هلبسه النهاردة في عيد ميلادي ، ولا عاوزاني ألبس حاجة الناس شافتني بيها قبل كده ويقولوا عني فقيرة !!!

-يارا في نفسها: ده أنا تقريبا الناس ماشفتنيش إلا بطقمين وبس ، ع كده أنا متكحرتة ع الأخر

-جاسر: يا بنتي هو في حد بيفتكر اكل ايه امبارح أما هيفتكر انتي كنتي لابسة ايه أصلاً !!
-شاهي: طبعا ، النادي كله هيتكلم عن حفلة عيد ميلادي ، فلازم اكون فيها ع أعلى مستوى
-فريدة: طبعاااااا .. احنا بنات عيلتنا لازم يبقوا مميزين
-ناهد: خلاص يا شاهي
-جاسر: والله مالوش لازمة
-فريدة: انزلي يا شوشو اختاري اللي انتي عاوزاه وعمك رأفت هيدفع تمنه ، ودي هدية بسيطة منه عشانك
-شاهي فرحة : اووووه ، ثانكس بجد
-رأفت بخضة : نعم ؟؟ مين ده اللي هيدفع ؟؟
-فريدة وهي تغمز لرأفت: مش انت قايلي ده امبارح يا رأفت
-رأفت: ده حصل امتى ده ؟؟ أنا مش فاكر
-فريدة بضحكة: هههههه دايما غاوي تهزر كده يا رأفت ..
-رأفت في نفسه: بتدبسيني وخلاص يا فريدة !!!!!
-شاهي: هتيجي معايا يا أدهم صح ؟؟
-أدهم: عندك أخوكي روحي معاه
-شاهي: أنا بثق في ذوقك انت يا أدهوم
-جاسر: أيوه ، ده حتى انتو الاتنين لايقين ع بعض ، ولا رأيك ايه يا يارا ؟
-يارا: فعلا .. فولة واتقسمت نصين
-شاهي: ياي .. بلدي في اسلوبك
-يارا: طب ركزي في الأكل اللي قدامك أحسن ، وخدي بالك لأحسن كرشك طلعله كرش ، أنا مش عارفة هتلبسي الفستان ازاي
-شاهي بضيق: ايه اللي بتقوليه ده ؟؟؟ كرش ايه اللي طلعلي
-يارا: بصي في المراية وانتي تعرفي
-شاهي: انطي .. شايفة !!!
-فريدة: ماتتكلميش معاها يا شوشو ، دي مش من مستواكي
-يارا: اللهم طولك يا روح
-جاسر: كلام الطبقية ونظام الاقطاعيين ده انتهي من زمان يا طنط فريدة
-فريدة: ولو !! برضوه ولاد الأصول هيفضلوا ولاد أصول !!!
-شاهي: ييس .. وكل واحد عارف نفسه ، مين ابن باشا ، ومين ابن خدامين
-يارا: انا بقول نسكت أحسن بدل ما أرد وتزعلي مني

-فريدة ليارا: وانتي يا بتاعة انتي !!
-عمر: اسمها يارا يا ماما ، مش بتاعة
-خالد: صح .. اسمها يارا يا ماما
-فريدة : مش فارقة ، المهم يا تلبسي حاجة تليق بينا يا متحضريش الحفلة ، أنا بقولك أهوو من الأول !!!
-يارا: اطمني يا خالتي ، أنا مش ناوية احضر أصلاً ..
-فريدة بفرحة: يكون أحسن برضوه
-شاهي: ياريت
-خالد: مش هتحضري ؟؟؟
-جاسر: ايه ده ، انتي مش ناوية تنورينا في الحفلة ؟؟؟
-أدهم: نعم ؟؟
-رأفت باستغراب : ليه ؟؟؟ مش هتحضري ليه يا بنتي ؟؟
-يارا: أصل ..آآآ… يعني تعبانة وكده
-جاسر: معلش في السؤال يا يارا ، ايه علاقة التعب بانك متحضريش الحفلة ؟؟؟
-يارا: عادي
-رأفت: لالالا .. يعني نبقى عاملين حفلة في البيت وانتي متحضريهاش
-فريدة: سيبها يا رأفت ، هي كده كويسة ، واحنا هنبقى مبسوطين ، مش هنحس بالفرق
-ناهد: فريدة ماينفعش الكلام ده
-فريدة: الله ! مش بدل ما تعمل حاجة زي عوايدها وتفضحنا بيها قصاد الناس
-شاهي: أيوه صح يا أنطي ، دي بتاعة مشاكل وفضايح ومش بيهمها حد !!
-يارا وقد نهضت: الحمدلله أنا شبعت .. عن اذنكو
-رأفت: يعني كان لازم الكلمتين دول يا فريدة ؟؟؟
-فريدة: يوووه ، هو أنا قولتلها ماتكلش !!
-خالد: ماما انتي زوديتها أوي معاها
-عمر وقد قام من مكانه : استني يا يارا أنا جاي معاكي
-فريدة: ولد !! اقعد كمل اكلك !!
-عمر: أنا عامل دايت

حاول عمر اللحاق بيارا والتخفيف عنها ولكنها قابلت ما حدث بـ …
-يارا: أنا من الأول عارفة يا عمر ، لو نزلت واعدت معاهم هنشتبك مع بعض
-عمر: والنبي يا شيخة ما تزعلي ، امسحيها فيا
-يارا: والله ولا زعلانة ولا حاجة ، معدتش تفرق كتير
-عمر: طب مش هتقوليلي مش ناوية تحضري ليه الحفلة ؟
-يارا: عاوز الصدق ولا ابن عمه ؟؟
-عمر: لأ ابن عمه طبعاااااااا
-يارا: ههههههههههههه ، يبقى مش هتعرف أبداً
-عمر: عشان خاطري قولي بقى يا ست الكل
-يارا: الصراحة انا معنديش حاجة تليق بجو الحفلات ده ، وأنا مش ناوية أسمع كلمة بايخة لا من الست أمك ولا من أصحابها المتزوءين دول
-عمر: أها
-يارا: فأحسن حاجة إني أخدها من قاصرها وأريح النهاردة
-عمر وقد أخذ يفكر في شيئاً ما: مممم
-يارا: ايه سرحت في ايه ؟؟؟
-عمر: هه ، ولا حاجة ، أنا بس بفكر ازاي أبسطك
-يارا: أنا أقل حاجة بتبسطني ع فكرة
-عمر: طب ايه رأيك نطلع نتفرج ع فيلم كوميدي
-يارا: مش مشكلة
-عمر: لالالالا .. تعالي بس أنا عاوز اشوف الضحكة منورة ع وشك
………

-رأفت: مش لازم كل شوية تسممي بدن البت بكلمتين من بتوعك
-فريدة: ماهي لازم تعرف ان الحفلة دي كلاس ، مش حاجة نظام الأفراح البيئة اللي تعرفها

-خالد في نفسه: يارا مش هتحضر ، ده ايه البواخة دي ، ده أنا كنت عامل حسابي أني هفضل معاها طول الحفلة ، لازم أقنعها انها تحضر !!

-رأفت: هي يعني كانت عايشة في الشارع ؟؟ دي كانت عايشة في الغردقة يعني مكان سياحي وكويس
-فريدة: برضوه هتفضل بيئة
-خالد بضيق : انا قايم
-جاسر: خدني معاك يا خالد
-فريدة: الله مش هتفطروا ؟؟؟؟
-جاسر وهو ينظر لشاهي : لأ ، أنا أصلي خايف ع كرشي ليبقلل ويضرب زي ناس
-شاهي: تقصد ايه ؟؟؟
-جاسر: انتي مش حاسة بالانتفاخ اللي طالعلك ؟؟
-شاهي بخضة: فين ؟؟؟ فيييين ؟؟؟
-جاسر: اهوو ، انتي مش شايفاه ولا ايه ؟؟ حتى اسألي أدهم
-شاهي: في حاجة فيا يا أدهم ؟؟
-أدهم: أها ..
-شاهي: ايه ؟؟ ايه ؟؟؟؟
-ادهم: أنا قايم أنا كمان
-شاهي: استنى بس ، أنا عاوزة أعرف شكلي وحش ولا لأ
-أدهم في نفسه: يعني ايه مش هتحضر ؟؟ طب ليه يعني ؟؟؟ ايه السبب اللي يخليها متحضرش معانا ؟؟؟؟؟ لازم أعرف السبب ايه !!!
-شاهي: يا أدهم رد عليا ، أنا بكلمك ؟؟
-ادهم: معلش يا شاهي ، سيبني شوية وهاجيلك
-شاهي: طيب أنا هجهز نفسي عشان ننزل سوا
-ادهم: ربنا يسهل
…………….
في غرفة المعيشة ،،،

كان عمر ويارا يشاهدان فيلماً كوميدياً حينما انضم إليهم جاسر وخالد ، ولحقت بهم شاهي لتعكر صفو الأجواء و…
-جاسر: بتتفرجوا ع ايه ؟؟
-عمر: ع فيلم
-جاسر: ما أنا عارف انه فيلم ، بس اسمه ايه ؟؟؟
-عمر:2Pink Panther
-جاسر: اها عارفه الفيلم ده ، حلو اوي
-خالد: فيلم مالوش حل فعلا ، دمه خفيف
-عمر: ده زوئي
-جاسر: شوفتيه قبل كده يا يارا ؟؟
-يارا: أنا ماليش في جو الأفلام
-شاهي : طبعاً ، هو انتي أصلاً تعرفي يعني ايه هوم سينما ، ده انتي اخرك التليفزيون 5 بوصة
-يارا: ليه ترانزستور ؟؟؟ بت انتي ، ابعدي عني أحسنلك بدل ما اخرشمك ولا ينفع تحضري حفلة ولا غيره
-شاهي: ياااي .. بيئة
-خالد: شاهي انتي اللي بتجلبي لنفسك معاها
-شاهي: ليه بقول شكل للبيع ولا انتو ما بتصدقوا تدافعوا عنها
-جاسر بحدة : شااااهي !!! خلاص ، ياتقعدي تتفرجي يا تطلعي
-شاهي: انا طالعة أصلاً أغير هدومي عشان أشتري حاجة تليق بيا ، هاتجي معايا أنا وادهم ولا لأ
-جاسر: لأ طبعاااااا ، ده انتي بتدوخي الواحد معاكي في حتة شراب مابالك بفستان
-شاهي: انت أصلاً بتسربعني ، مش بعرف أخد راحتي في الشوبنج
-جاسر: طب الحقي اجهزي قبل ما أدهم يطفش هو كمان منك
-شاهي: اووبس .. أما ألحق أجهز بسرعة لأحسن مده هتأخر عليه
-خالد: ربنا يعينه ع ما باله !
-جاسر: ههههههههههههههه

ثم دلفت صباح إلى غرفة المعيشة لتبلغ يارا بأن عمها رأفت يريدها و…
-صباح: يا آنسة يارا ، رأفت بيه عاوزك تحت في الصالون
-يارا: حاضر ، أنا نزلاله حالاً
-عمر: انا هوقف الفيلم لحد ما تيجي ونكمله
-يارا: مش مشكلة ، نبقى نشوفه وقت تاني ، عن اذنكو
-جاسر: اتفضلي

وما إن خرجت يارا من الغرفة حتى استأذن جاسر و…
-جاسر: اووبا ، أنا نسيت موبايلي تحت ، أما أنزل أجيبه
-خالد: اوك .. مستنيك عشان نشوف نظامنا ايه النهاردة
-جاسر: أها … ع طول بس ، هاجيبه واطلعلك

وحينما خرج جاسر ، اقترب عمر من أخيه خالد وجلس بجواره ليخبره بأمر ما و…
-عمر: كويس ان احنا لوحدنا الوقتي
-خالد: عاوز ايه ؟
-عمر: احم.. كنت عاوزو منك ..احم ..آآآآ.. يعني سلفية كده
-خالد: تاني ؟؟؟ انت مش لسه أخد مني أد كده من يومين
-عمر: معلش ، دي أخر مرة ان شاء الله ، وبعدين أنا هسددلك كل اللي خدته ع الجزمة القديمة
-خالد: اتلم ياله .. ايه ع الجزمة القديمة دي
-عمر: أقصد يعني هديك كل اللي خدته منك
-خالد: انت عمرك ما دفعتلي جنية
-عمر: بكرة هدفعلك .. الفلوس بس تجري في ايديوأنا هنغنغك ع الأخر
-خالد: موت يا حمار ، المهم عاوز كام يعني ؟؟؟
-عمر: حاجة بسيطة ألفين جنية بس
-خالد: نعم ؟؟؟؟ ليه ان شاء الله ؟؟؟ أوعى ياض تكون بتجيب بيهم مخدرات ، ده انت وقعتك سودة لو قربت من الهباب ده !!!!
-عمر: لأ عيب عليك ، أنا بشرب بس حشيش !!!
-خالد وقد أمسك به من رقبته : ده يبقى اخر يوم في عمرك
-عمر: بهزر والله بهزر
-خالد: وأنا مش هديك مليم واحد غير لما أعرف ليه
-عمر: والله دي حالة انسانية ..
-خالد: وله !! انت بتشتغلني ياض ؟؟؟
-عمر وهو يحاول التحرر من قبضته : وربنا ما بكدب ده فعلاً حالة انسانية مهمة بالنسبالي
-خالد: انطق وقول عاوز الفلوس ليه ؟؟؟
-عمر: عاوز اجيب فستان ليارا عشان تحضر بيه الحفلة
-خالد بدهشة: ايييه ؟؟؟
-عمر: اه والله دي الحقيقة ، هي مش عاوزة تحضر الحفلة عشان معندهاش حاجة تلبسها وأنا عاوزها معايا ..آآ…قصدي تحضر معانا
-خالد: قولتيلي بقى
-عمر: ها ؟؟ هتديني الفلوس ؟؟؟
-خالد: ممممم…
-عمر: ها يا سيد الناس هتديني الفلوس ؟؟؟
-خالد: ربنا يسهل
-عمر: طب ايدك بقى عشان ألحق أروح أجيبلها حاجة حلوة
-خالد: أنا عندي بقى فكرة أحلى .. أنا جاي معاك ننقيلها حاجة ع ذوقنا
-عمر: لأ أنا عاوز اجيبلها حاجة ع ذوقي أنا بس !
-خالد: انت هتتأمر !!! خلاص مافيش فلوس
-عمر: خلاص يا عم ، الحوجة وحشة أصل !!!
-خالد: طب قوم ألبس خلينا نلحق نروح ونرجع بسرعة
-عمر: فوريرة …!!!

……….
كان رأفت يطالع الجريدة الاقتصادية حينما كان أدهم يبحث عن الشاحن الخاص بهاتفه المحمول ، فطلب منه رأفت أن يضع أحد الملفات بالمكتب ، ثم جاءت إليه يارا و…
-رأفت لأدهم: أدهـــم !!
-أدهم: أيوه يا بابا
-رأفت: معلش يا حبيبي حط الملف ده ع المكتب بتاعي جوا في أوضة المكتب
-ادهم: حاضر ، هوف بس الشاحن واوديه
-رأفت: طب خده في ايدك
-ادهم: ماشي

أخذ أدهم الملف من والده ، وتوجه ناحية غرفة المكتب ليضعه بالداخل ، ثم دلفت يارا إلى غرفة الصالون و…
-رأفت: تعالي يا يارا يا بنتي
-يارا: خير يا عمي
-رأفت: قوليلي بقى ، مش عاوزة تحضري الحفلة ليه ؟؟
-يارا: يا عمي أنا قولتلك ماليش في الجو ده
-رأفت: وانا مش مصدقك
-يارا: ليه بس ؟؟؟
-رأفت: عاوزك تقوليلي وبكل صراحة انتي مش عاوزة تحضري عشان فريدة ؟؟
-يارا: لا والله
-رأفت: اومال ليه ؟؟
-يارا: يعني .. احم . آآآآ
-رأفت: قولي على طول يا يارا !
-يارا: يعني أنا… أنا معنديش حاجة مناسبة للحفلة وآآآ
-رأفت: يعني ده السبب
-يارا وهي تهز رأسها بالايجاب : أها
-رأفت: يا بنتي مش مستهلة والله ده أنا فكرت تكون في حاجة مهمة ولا حاجة ، وع العموم ماتشليش هم احسن حاجة هتكون عندك
-يارا: أنا مش عاوزة حاجة يا عمي
-رأفت: لأ ازاي ، انتي شاوري بس ع اللي نفسك فيه وهيكون عندك
-يارا: ربنا يخليك يا عمي
-رأفت: أنا هاجيبلك حاجة ع ذوقي ويا رب تعجبك
-يارا: أكيد هتعجبني .. كفاية أنها منك
-رأفت: عاوزك تنوري في الحفلة ، ومافيش حاجة اسمها متحضريش ، ماشي ؟
-يارا: ربنا يسهل
-رأفت: طب خدي حطيلي الجرنان ده ع المكتب ، هبقى أقراه بعدين
-يارا: اوك يا عمي
-رأفت في نفسه: على الله كازناوفا يكون لسه في أوضة المكتب ..
………
كان جاسر قد نزل وراء يارا لكي يعرف ما الذي يريده عمها منها ، واستمع إلى ما دار بينهما و….
-جاسر في نفسه : بقى ده السبب اللي مش مخليكي تحضري الحفلة !! ده الغالي يرخصلك يا يارا .. النهاردة هتكوني انتي ملكة الحفلة ، أنا هاضطر اسفاً أروح مع شاهي بس عشان خاطرك انتي يا يارا ، هنقيلك حاجة ان شاء الله تعجبك وتنوري الحفلة فيها ..
………….

في غرفة المكتب ،،،،،

أخذت يارا الصحيفة من عمها وتوجهت بها ناحية غرفة المكتب لتضعها على مكتب عمها ، كانت تلك هي المرة الأولى التي دلفت فيها يارا إلى غرفة المكتب ، أُعجبت يارا بتصميم الغرفة كثيراً ، ولأول مرة تلمح وجود دولاب منفصل بالغرفة به الكثير من الأسلحة النارية ، وعدداً من الجوائز والكؤوس و..
-يارا : ماشاء الله ، الأوضة فعلاً حلوة .. حاجة كلاسيك وشيك ، أول مرة أخد بالي منها ، ايه ده اللي هناك ده ؟؟

اقتربت يارا من الدولاب وأخذت تنظر لما بداخله بتفحص و…
-يارا: ماشاء الله ، كل دي أسلحة !! هما هيعلنوا الحرب هنا ولا ايه .. لأ وفي كؤوس كمان وجوايز .. ماشاء الله ، حاجة حلوة الصراحة ..مممم… بس الإزاز مش مبين الحاجة كويس ، أحسن حاجة أعملها أفتح الدولاب كده وأشوف اللي فيه قبل ما حد يجي !!

لم تنتبه يارا إلى أن أدهم كان مازال متواجداً بالمكتب جالساً في الخلف يشحن هاتفه ، وما إن رأها تدلف وتتحدث إلى نفسها وهي تنظر للدولاب حتى نهض من مكانه وتوجه إليه بدون أن تشعر ووقف خلفها و…………

*********************
إلي هنا ينتهي الفصل العشرون من رواية الفريسة والصياد بقلم منال سالم

تابعوا صفحتنا على الفيس بوك للمزيد من القصص الرومانسية
حمل تطبيق قصص وروايات عربية من جوجل بلاي

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق