غير مصنف

رواية الفريسة والصياد – منال سالم – الفصل التاسع والثلاثون

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية مصرية جديدة للكاتبة المتألقة منال محمد سالم نقدمها علي موقعنا قصص 26  وموعدنا اليوم مع الفصل التاسع والثلاثون من رواية الفريسة والصياد بقلم منال سالم 

رواية الفريسة والصياد بقلم منال سالم – الفصل التاسع والثلاثون

تابع أيضا: قصص رومانسية

رواية الفريسة والصياد - منال سالم
رواية الفريسة والصياد – منال سالم

رواية الفريسة والصياد بقلم منال سالم – الفصل التاسع والثلاثون

توجهت يارا ناحية السيارة ، وظلت تصرخ وتشير إليها بيدها لكي تتوقف ، وبالفعل توقف قائد السيارة و…
-يارا بصوت عالي : يا كاااااابتن ، ياااااااااااا كابتن ، وقف العربية الله يكرمك ، أرجووووك ساعدني ، ياااااااااااا كابتن ، الحقني ..

-يارا وهي تلهث بعد أن توقفت السيارة : هه .. الحمدلله ، هاااه ، أنا كنت خايفة انك ماتوقفليش ، بس الحمدلله انك وقفتلي

ترجل قائد السيارة منها ، لتتفاجيء يارا بأنه ……..
-عدلي: وهو أنا ينفع ماقفلكيش يا … يا يارا !!!
-يارا بصدمة : لألألأ .. مش ممكن .. آآآ… انت ..!!!
-عدلي: ايوه انا يا .. يا يارا هانم
-يارا : لألألأ …

فرت يارا من أمامه مسرعاً ، ولكن عدلي أوقفها بصوت طلقة رصاص أطلقها في الهواء ليخيفها و…
-بوووم
-عدلي: الطلقة الجاية هتكون في دماغك
-يارا برعب: آآآ… انت … انت عاوز مني ايه ؟؟
-عدلي وقد أمسك بها من ذراعها: عاوز كل حاجة منك ، كل حاجة !!
-يارا متآلمة : آآآآآه …
-عدلي: اتنيلي اركبي العربية
-يارا: لأ …
-عدلي : خشي يا بنت الـ *** العربية

ضرب عدلي يارا بمقدمة سلاحه في رأسها مما أفقدها الوعي ، ثم وضعها داخل السيارة و انطلق نحو المنزل القديم ..

في نفس التوقيت كانت هناك سيارة أخرى تمر بالطريق وشاهد من بداخلها قيام عدلي بضرب يارا ووضعها بالسيارة و…
-سيدة ما: شوفت اللي أنا شوفته ؟؟
-رجل ما: أهــا
-سيدة ما: العربية اللي عدينا عليها دي ، كان فيها واحد بيضرب بنت كده وآآآ….
-رجل ما مقاطعاً: مالناش دعوة
-سيدة ما: ازاي مالناش دعوة ؟؟ البنت دي ممكن تكون مخطوفة ولا حاجة
-رجل ما: وممكن يطلع ده باباها ومضايق منها ، ليه احنا ندخل نفسنا في مشاكل ووجع دماغ ، خلينا في حالنا
-سيدة ما: ما تبقاش سلبي ، افرض حياة الانسانة دي في خطر
-رجل ما: ما تبقى في خطر ، ولا تولع حتى ..!!!
-سيدة ما : ياخي حرام عليك ، ترضى لو حد فينا مكانها واحد يقول عليك كده
-رجل ما: يوووه
-سيدة ما: بص انا مش هاسكت عن اللي شوفته ده ، لأن بسكوتنا ده هنكون بنشارك في اللي هي بتتعرضله
-رجل ما: يا شيخة بطلي كلام الجرايد والمثالية الزايدة بتاعتك دي
-سيدة ما: انت غلطان ، دي مش مثالية ، دي انسانية ، طب افرض الراجل ده عاوز يغتصبها ولا بيعتدي عليها زي ما بنسمع عن الرجالة اللي بتعتدي ع البنات الصغيرين ، عاوزنا نقف نتفرج عليهم وهما بيعملوا كده وبيفلتوا من العقاب ؟؟ عاوزنا نشيل ذنبهم ؟؟؟
-رجل ما: اووف
-سيدة ما: لازم نبلغ عن اللي شوفناه
-رجل ما: والله انتي ما هترتاحي غير لما تودينا في داهية
-سيدة ما: وهنروح في داهية ليه ؟؟ احنا هنقول عن اللي شوفناه ، والبوليس هيتصرف
-رجل ما: يا ستي البوليس عندنا مش بيتحرك إلا في حالة واحدة ، لما تكون في كارثة كبيرة وأخرتها بتتقيد ضد مجهول
-سيدة ما: لأ مش صح
-رجل ما: بصي هو ده اللي بيحصل !
-سيدة ما: بص أنا مش هرغي كتير ، بس من الأخر كده أنا هبلغ البوليس باللي شوفته ، وهما يتصرفوا
-رجل ما: انتي برضوه مصممة ع اللي في دماغك
-سيدة ما: أيوه .. وبعدين أنا بس هاقولهم ع اللي شوفته ، وآآآ… ومش هأقول اسمي
-رجل ما: والله انتي غاوية مشاكل وبتدوري عليها فين وتروحيلها
-سيدة ما: شششش .. اسكت بقى عشان هاطلب النجدة
………..
وبالفعل قامت تلك السيدة بالاتصال بالشرطة وإبلاغهم هاتفياً بما رأته و..
-سيدة ما: ألوو ، بوليس النجدة
-النجدة: أيوه يا فندم
-سيدة ما: لو سمحت أنا كنت عاوزة أبلغ عن حاجة شوفتها وأنا في الطريق
-النجدة: خير يا فندم
-سيدة ما: أنا شوفت واحد بيضرب بنت شكلها صغير في الطريق وخدها معاه بالعافية في عربيته ، فالظاهر كده انه خاطفها
-النجدة: وايه اللي خلى حضرتك تفتكري انه خاطفها ، ماهو ممكن يكون والدها أو آآآ…
-سيدة ما مقاطعة : يا حضرت الظابط مش ممكن يكون باباها ، وبعدين أنا شوفتهم ع طريق الغردقة القاهرة الصحراوي وفي حتة تقريباً شبه مقطوعة ، والبنت كانت زي ما يكون مش في وعيها
-النجدة: فين بالظبط
-سيدة ما: زي ما قولت لحضرتك في طريق الغردقة القاهرة الصحراوي ، تقريبا في الكيلو (( ….))
-النجدة: تمام طب اسم حضرتك ايه ؟؟
-سيدة ما: هاااه
-النجدة: اسم حضرتك ايه عشان أكمل البلاغ ؟؟؟
-سيدة ما بتردد : آآآآ…. بص أنا بلغت حضرتك باللي شوفته ، لكن بصراحة مش هاقدر أقول اسمي لأني مش حابة يحصلي أي مشاكل !
-النجدة : يا هانم كده البلاغ هيكون ناقص وبعدين مشاكل ازاي وآآآ… الووو .. الووووو
…..

أغلقت السيدة الهاتف و…
-سيدة ما: أنا كده عملت اللي عليا صح ؟
-رجل ما: ارتحتي الوقتي
-سيدة ما: أها يعني .. ع الأقل أنا عرفتهم باللي شوفته وهما بقى أحرار يتصرفوا
-رجل ما: ماشي

………………
في منزل يارا بالغردقة ،،،

وصل رأفت إلى الغردقة بالطائرة ، ثم توجه مسرعاً إلى منزل الجدة نجاة ، طرق الباب ففتح له خالد و…
-خالد: بابا ، اتفضل
-رأفت: ازيك يا خالد ، ها في جديد ؟؟
-خالد: لا والله لسه يا بابا
-رأفت: لا حول ولا قوة إلا بالله ، يا رب طمنا عليها
-خالد: يا رب

لاحظ رأفت ان ابنه خالد يمسك في يده هاتفاً محمولاً وحافظة ما ، فسأله عنهما و…
-رأفت: الله ، اومال ايه اللي في ايدك ده
-خالد وقد انتبه لما في يده : هه .. ولا حاجة يا بابا ، ولا حاجة !!!
-رأفت: اومال فين أخوك أدهم ؟؟؟
-خالد: من ساعة ما نزل وهو لسه مرجعش
-رأفت: اه يا عيني ، أكيييييد متأثر باللي حصل
-خالد: أها .. بصراحة يا بابا أنا مكونتش متوقع أن ادهم يكون كده
-رأفت: عشان انت مش عارف أخوك كويس
-خالد: هه
-رأفت: اخوك طول عمره من وهو صغير حنين، وبيحب غيره، بس ..بس ماتفهمش اما كبر أمك لعبت في دماغه ولا عملت فيه ايه خليته يرفض يشتغل معانا وآآآ…
-خالد مقاطعاً : لأ يا بابا ، مش كده ، الحكاية إن ادهم مكنش حابب مجال الشغل بتاعنا ، واحنا ماحولناش نفهمه كويس ، ولا نعرف هو عاوز ايييييه !!
-رأفت: نعم ؟؟
-خالد: ايوه يا بابا ، كلنا كنا فاهمين ادهم غلط .. لكن بالنسبالي هو طلع عكس اللي كنت مفكره عنه ! وربنا يسامحني ع ظني السيء فيه ..!!!

………………….
في المنزل القديم المهجور ،،،،

وصل عدلي بسيارته إلى المنزل القديم ، ركن سيارته أمام المدخل ثم فتح الباب الخلفي لسيارته وجرجر يارا خارج السيارة و…
في داخل المنزل ،،،
-شخص ما : الظاهر إن الباشا وصل ، أنا سامع صوت عربيته بتركن برا
-شخص أخر: طب بسرعة يالا عشان نستقبله

في الخارج ،،
-عدلي وهو يجرها من شعرها : يالا يا بت ، قدامي
-يارا متآلمة: آآآآآه .. سيبني
-عدلي: كنتي مفكرة انك هتعرفي تهربي مني ، انتي مش هاتخرجي من هنا إلا على نقالة
-يارا : آآآآآآآآآه … حرام عليك ، أنا عملتلك ايه بس .. آآآآه

خرج الأشخاص الموجودين بالمنزل ، فصاح بهم عدلي و…
-عدلي : لسه فاكرين يا بهايم
-شخص ما: ايه اللي جاب البت دي هنا
-شخص أخر: هي خرجت ازاي ؟؟؟
-عدلي بعصبية : ما انتو لو مركزين في اللي مكلفكم بيه ماكنتش هاتتنيل تهرب منكم ، وانتو نايمين على ودانكم !!
-شخص ما وهو يمسك بيارا: عنك يا باشا ، تعالي يا بنت الـ.****
-يارا: ابعد ايدك عني يا قذر
-شخص ما وهو يصفعها : اخرسي ياااا بت
-يارا متآلمة : آآآآآآه
-عدلي: لولا اني جيت في الوقت المناسب كان زمانتها هربت وبلغت عن المكان وعنكم وكنتو روحتوا في داهية وخدتوني معاكو في الرجلين يا بهايم !
-شخص أخر: الحمدلله يا باشا انك موجود
-عدلي: أنا مش هاصلح وراكو ، خدوها جوا ، وإتأكدوا المرادي انها مش هتعرف تهرب لحد ما أشوف هأعمل معاها ايه !!
-شخص ما: حاضر يا باشا
-يارا: والله ما هتفلتوا باللي عملتوه ، هاتروحوا في داهية ، محدش هايسيبكم !!
-عدلي: سكت البت دي ، مش عاوز أسمعلها أي حس
-شخص ما: حاضر يا باشا ، يالا يا بت !!!!

…………………………
في فيلا رأفت الصياد ،،،،

كانت الاستعدادات للحفلة التي تقيمها فريدة على وشك الانتهاء ، كاد عمر ان يجن من تصرفات والدته ، ولكن ليس بيده الحيلة ، وفي نفس الوقت كانت فريدة تصر على أن يكن الاحتفال مميزاً ويحضره عدداً لا بأس به من اصدقائها
-فريدة: يا سلاااااااااااااام ، اخيرااااا هاحتفل براحتي ، اوووف ، ده انا كنت هاتخنق من البت دي ، يا رب تكون ماتت ، خليني أحس بولادي تاني وهما راجعين في حضني

-صباح وهي تطرق باب غرفة فريدة: يا فريدة هانم ، الضيوف بدأوا يوصلوا تحت
-فريدة: طب رحبي بيهم لحد ما أنزل تحت أرحب بيهم بنفسي
-صباح: حاضر يا هانم

-صباح في نفسها: الولية اتجننت ، زي ما يكون يارا كانت عاملاها عمل ، ياني لو رأفت بيه عرف باللي هي بتعمله ، هيطلعهم عليها .. حظك حلو انه مش موجود في الفيلا … !!

………..
في غرفة عمر ،،،،
-عمر: لأ أنا مش هاسكت عن المهزلة اللي بتحصل تحت دي ، بقى احنا في مصيبة وماما مش مخلصها وعاملة حفلة .. دي ناقص تجيب زفة ، للدرجادي بتكرهي يارا ، أنا لازم أتصرف وأبوظ الحفلة دي بأي شكل …!!!

……………….
في أحد مكاتب المباحث الجنائية ،،،،
حضر جاسر بصحبة زملائه في المكتب ليشاركهم ما توصلوا إليه من معلومات و…
-إسلام: مكنش في داعي انك تيجي يا جاسر بيه ، لو كان في أي حاجة كنا بلغناك بيها
-جاسر: ازاي ماجيش و آآآ.. دي … دي اختي
-وائل: ان شاء الله هنلاقيها
-أيمن: احنا حاطين عينين لينا في كل حتة ، بس لحد الوقتي اللي اسمه عدلي ده ماظهرش ، لا عند بيته ولا حتى في شركته
-جاسر: وده مخليني متأكد انه ورا خطف يارا
-اسلام: أنا كمان موصي حبايبنا في الغردقة لو بلغهم أي خبر عن يارا يتصلوا بيا فوراً إن شاء الله حتى نص الليل
-جاسر: اها …

……………………
في منزل يارا بالغردقة ،،،
عاد أدهم من الخارج وعيناه حمراواتان من كثرة البكاء ، حاول أن يخفي حزنه ولكنه لم يستطع ، تفاجيء بوجود والده ، فذهب إليه واحتضنه بشدة و….
-ادهم: بابا
-رأفت: ادهم يا بني
-ادهم وهو يحتضن أبيه : يارا ضاعت مني يا بابا ، مقدرتش احافظ عليها
-رأفت وهو يربت على ظهره : اهدى يا بني ، ان شاء الله هنلاقيها
-ادهم: انا اتلهيت عنها ، انا اديتهم الفرصة ياخدوها مني ، أنا السبب .. أنا السبب !!
-رأفت: بس يا بني ، إن شاء الله هنلاقيها وهترجعلنا
-أدهم وقد امتلأت عيناه بالدموع: ياااا رب يا بابا ، يااااااا رب
……
-خالد: ادهــم !!
-أدهم وهو يمسح دموعه: أيوه يا خالد
-خالد بتردد: آآآ… أنا ، أنا أسف
-ادهم: هه !
-خالد: انا أسف يا أدهم على كل كلمة قولتها غلط في حقك ، سامحني ياخويا ، أنا .. انا مقصدش ده
-ادهم: مافيش مشكلة
-خالد: انا بس خايف على يارا ، وعاوزلها الأحسن ، و آآآ.. وكنت مفكر انك آآآ…
-ادهم مقاطعاً : ششش .. مافيش داعي تقول حاجة يا خالد خلاص
-خالد: انا كنت عاوزك تفهم إني ….
-ادهم مقاطعاً: انت أخويا ، ومهما قولت فأنا مش هازعل منك ، أنا كل اللي يهمني الوقتي هو يارا ، إني ألاقيها وأعرف فين مكانها !!
-خالد: إن شاء الله هنلاقيها ، وهنعمل المستحيل عشان نوصلها
-ادهم: يا رب
…………………….

في فيلا رأفت الصياد ،،،،
بدأت فريدة تستقبل ضيوفها في الحفل المبهر الذي أقامته ، كانت تضحك وتمزح مع الأخرين بطريقة أثارت فضول بعض المدعوين و…
-أحد الحضور: مش غريبة ان فريدة تعمل حفلة في التوقيت ده
-سيدة أخرى : أه فعلا .. عادة مش بتعمل بارتي إلا لما يكون في مناسبة أو حاجة تستاهل
-شخص أخر : أنا سمعت انها عاملة الحفلة دي مخصوص عشان خلصت من البنت قريبة جوزها
-سيدة رابعة: لا والله .. قولتلي بقى
-شخص أخر : أه طبعاااا .. دي البنت كانت مطلعة عينها
-سيدة أخرى : أهـــا
-سيدة رابعة: طب ششش لأحسن هي جاية علينا
-فريدة وهي تبتسم: ازيكم يا جماعة ، مبسوطين ؟؟؟
-أحدالمدعوين: أه جداااا يا فريدة هانم .. بجد الحفلة كلاسيك وشيك جدا
-فريدة هانم : ميرسي أوي لذوقك .. انجوي بالبارتي ، ده لسه في حاجات جميلة كمان شوية
-أحد المدعوين: أكييييد طبعاً

-فريدة بنفسها: أخيراااا ، قدرت أحس بنظرة الناس بالاعجاب باللي بعمله ، اوووف ، ده أنا كنت قربت أنسى إني هانم وصاحبة الفيلا دي ..

………..
نزل عمر إلى الحديقة حيث الحفلة المقامة ، ثم توجه نحو مكان البوفيه المفتوح وصاح باعلى صوته ….
-عمر صائحاً: يا جمااااااااهة .. بعد اذنكم ، ممكن تبصولي شوية
-أحد الأشخاص: هو في ايه ؟؟
-شخص أخر : هو عمر عاوز ايه ؟؟؟
-سيدة ما : الله مش ده عمر اللي هناك
-فتاة ما: هو عمر عاوز ايه ؟؟؟

-عمر مكرراً : يا حضــــرات .. بعد اذنكم ..
-فريدة : الله !! هو عمر بيعمل ايه هناك ؟؟؟؟
-عمر بصوت عالي: معلش يا جماعة ، أنا مش هاخد من وقتكم كتير ، بس يعني كنت عاوزك اقولكم على حاجة صغيرة ، انا عارف انها مش هتفرق معاكو في حاجة ، بس هي هتفرق معايا أنا كتيررررر
-فريدة: عمـــر !!
-عمر مكملاً: النهاردة ماما قررت تعمل حفلة ، لأ ومش أي حفلة .. طبعاً زي ما حضراتكو شايفين انها ع مستوى عالي كالعادة
-تنوعت ردود الجميع ما بين : هو في ايه ؟؟ هو عمر بيقصد ايه ؟؟ الله ! عمر عاوز ايه ؟؟
-عمر: الصراحة هي الحفلة معمولة لأن .. لأن ماما فرحانة ان يارا بنت عمي اتخطفت !!!
-الجميع : ايييييييه ؟؟؟
-عمر: وعشان يارا اتخطفت ففريدة هانم ملاقتش احسن من دي مناسبة عشان تحتفل مع حضراتكو .. بس للأسف أنا اكتشفت أن .. ان آآآآ…
-فريدة بحدة: عمــــــــــر !!!
-عمر: اكتشفت ان أمي مافيش في قلبها رحمـــة تجاه انسانة كل ذنبها ان امها كانت بنت شغالة ، وان بنت الشغالة دي اتجوزت عمي الله يرحمه ، فإزاي تتشرف بيها قصادكم
-فريدة : اخرس يا عمر
-عمر مكملاً: ونسيت في نفس الوقت ان الكل زعلان وحزين وقالب الدنيا عليها ، فقررت تحتفل بالمناسبة دي .. وأظن لو أي حد في حضراتكو كان عنده حد من عيلته مخطوف ، أبسط شيء انه هيشاركك ولو وجدانياً ويحس باللي انت فيه ، مش يحتفل ولا كأن في حاجة حصلت .. فلو حضراتكو حابين تشاركوا فريدة هانم فرحتها فبراحتكو ، لكن .. لكن أنا عاوز أقولكم ان بالنسبالي انا مش مرحب بوجودكم في الظروف دي هنا في الفيلا
-فريدة: عمـــر ، انت اتجننت ، ازاي تقول كده
-عمر: أنا بس بعرف الضيوف الظروف اللي بنمر بيها ، وهما ليهم حرية الاختيار
-فريدة: انت.. ولد مش متربي ! ازاي تعمل كده ؟؟
-عمر: فعلاً أنا مش متربي، وناقص تربية .. اعذروني ع صراحتي .. أنا أسف .. اتفضلوا كملوا اللي بتعملوه

شعر معظم الحاضرين بالاحراج مما قاله عمر عن يارا وظروف اقامة الحفل ، فبدأ البعض منهم في الانصراف ، والبعض الأخر في الهمس والتحدث بالسوء عن فريدة ، بينما شعرت فريدة بالضيق من تصرف عمر و…
-فريدة : ايه يا جماعة رايحين فين
-أحد الحاضرين : معلش يا فريدة هانم ، مش هينفع نكون هنا في الظروف دي ، سوري
-سيدة ما: فريدة هانم ، كان لازم حضرتك تقدري الظروف ، ومكنش في داعي للبارتي دي ….

-فتاة ما: واحدة معندهاش دم
-فتاة اخرى: جالها قلب ازاي تعمل الحفلة والبنت مخطوفة
-فتاة ما: مش عارفة والله
-فتاة اخرى: بقولك ايه ، أنا ماشية .. مالهاش لازمة البارتي دي
-فتاة ما: وأنا جاية معاكي

………….
في احد مكاتب المباحث الجنائية بالقاهرة ،،،
كان الجميع يعمل على قدم وساق من أجل ايجاد يارا و…
-اسلام: مافيش ولا كمين لحد الوقتي سجل دخول العربية دي القاهرة
-وائل: ممكن يكون اتخلصوا من العربية ، ودخلوا القاهرة بعربية تانية
-أيمن: أوصاف يارا مع كل الرجالة بتوعنا ع الطريق ، واكيد لو حد شافها هتتوقف العربية ، وهيبلغونا ع طول

ثم طرق احد العساكر الباب و…
-العسكري: باشا
-اسلام: خير يا عسكري
-العسكري : يا باشا رامي باشا من مباحث الغردقة بيطلب حضرتك في مكتبك من بدري ومحدش بيرد
-اسلام: اها … طيب أنا هاكلمه ، امشي انت
-العسكري : حاضر يا باشا
-اسلام : وهو رامي هيعوز ايه مني
-وائل: كلمه، يمكن عاوز يعرف منك حاجة عن يارا ، واهو برضوه عاوز يساعد
-اسلام: اوك

طلب اسلام زميله رامي هاتفياً و…
-اسلام هاتفياً: حبيب قلبي رامي باشا
-رامي: اسلام باشا ، منور والله
-اسلام : الله يخليك
-رامي: بقولك يا باشا
-اسلام: خير يا باشا
-رامي: احنا كان جالنا بلاغ غريب شوية
-اسلام: بلاغ غريب !! ده عن ايه ده ؟؟؟
-رامي: بص انا مش عارف بالظبط عن ايه ، بس واحد زميلي كان بيحكي عن ان في واحدة اتصلت من شوية بالنجدة وبلغت عن انها شافت بنت بتتخطف ع طريق الغردقة القاهرة الصحراوي
-اسلام: ها وبعدين ؟
-رامي: والست دي مقالتش عن اسمها ولا عن أي تفاصيل غير ان البنت صغيرة والراجل كان كبير والكلام ده كان تقريبا في الكيلو ((….))
-اسلام: أها
-رامي : أنا قولت أبلغك باللي سمعته اذ ربما يفيدك في حاجة ، مش انتو لسه بتدوروا ع البنت اياها دي
-اسلام: ايوه
-رامي: أنا لما وصلني حاجة حاولت أوصلهالك
-اسلام: اها ، طب الست دي مقالتش اسمها ايه ؟؟؟
-رامي : لأ .. واحنا بعتنا دورية في المنطقة هناك تتحرى عن البلاغ بس ملقناش حاجة
-اسلام: هو البلاغ بتاع الست دي كان من امتى ؟؟؟
-رامي: تقريباً من حوالي ساعتين تلاتة ، مش عارف بالظبط
-اسلام: مافيش أي بيوت في المنطقة اللي الست اتكلمت عنها ؟؟ أي ناس عايشة ولا أي حاجة ؟؟؟
-رامي: لأ معتقدش ، معظم المناطق هناك صحرا ، يا بيوت خربانة مافيهاش حد
-اسلام: بيوت خربانة !!!!
-رامي : أها
-اسلام: رامي ابعت كل القوات اللي عندك تمشط المنطقة كويس ، يارا احتمال تكون هناك
-رامي: ماشي ، ولو اني أشك يعني
-اسلام: بس برضوه ماتستبعدش … أهو أي خيط بنمشي وراه
-رامي: تمام
-اسلام: ولو في حاجة عرفتها كلمني
-رامي: اوك

أنهى اسلام المكالمة مع رامي ، ثم اتصل بجاسر ليبلغه بـما حدث و…
-اسلام هاتفيا: بس كده
-جاسر: اسلام انت قولتله يبعت أي دورية تمشط المنطقة اللي هناك
-اسلام: ايوه
-جاسر: أنا مسافر الغردقة الوقتي ، ولو عرفت حاجة بلغني
-اسلام: انت هتسافر وانت لسه تعبان
-جاسر: أي حاجة تهون ، المهم أطمن ع يارا
-اسلام: ان شاء الله خير

…………….
في منزل يارا بالغردقة ،،،،
طلب جاسر خالد ليبلغه بما عرف من معلومات عن يارا و…
-خالد هاتفياً: يعني .. يعني في احتمال تكون هنا ؟؟
-جاسر: أه
-خالد: طب .. طب وهتعرفوا مكانها ازاي ؟؟
-جاسر: بص الشرطة هتمشط المنطقة كلها اللي هناك ، ولو في جديد هيبلغونا
-خالد: تمام ، يا رب يطمنا عليها
-جاسر: ع فكرة أنا جاي في الطريق ليكو
-خالد: ايه جاي ؟؟ يا بني صحتك ! ده انت لسه تعبان وملحقتش ترتاح
-جاسر: يا خالد دي اختي ، هي مش حد غريب عشان أطنش وأقول أرتاح ، وبعدين أي حاجة تعدي لكن يارا لأ
-خالد: ربنا يبارك في عمرك يا جاسر ، بجد مافيش زيك
-جاسر: أنا لو عرفت جديد برضوه هبلغكم
-خالد : تمام

……..
-أدهم: خير يا خالد في ايه ؟؟
-خالد: جاسر بيقول ان احتمال يارا تكون لسه هنا في الغردقة
-أدهم: اييييه ؟؟ لسه هنا !!
-خالد: ايوه ، وباعتين دوريات تمشط الطريق عليها
-أدهم بلهفة : دوريات ؟؟ طب ليه ؟؟ هو .. هو في حد شافها ؟؟؟
-خالد: في بلاغ اتقدم ان في بنت اتشافت مع واحد ع الطريق وهو بيضربها ، وجاسر شاكك انها تكون هي
-ادهم: طب الكلام ده كان فين ؟؟؟
-خالد: ما أنا قولتلك ع الطريق
-ادهم: يا خالد فين بالظبط
-خالد: معرفش ، هو بيقول ان في دوريات هتمشط المنطقة اللي اتشاف فيها البنت ، ولو في حاجة هيبلغونا !!!
-ادهم: أنا .. انا عاوز أعرف هي فين ؟؟؟ عاوز أروح انقذها بنفسي
-خالد: بلاش تهور ، مش لما نعرف بالظبط هي فين تبقى تروح !!!!!

……………
في المنزل القديم المهجور ،،،،

سمع أفراد العصابة صوت سيارات الشرطة وهي تجول بالقرب من المنطقة و…
-شخص ما: سامع السرينة دي
-شخص أخر: ايوه سامعها
-عدلي: اطلع شوف في ايه بيحصل بس من بعيد ، واوعى حد ياخد باله منك
-شخص ما: حاضر يا باشا
-عدلي : وانت جهز العربيات ، احنا هنمشي من هنا
-شخص أخر: والبت اللي جوا ؟؟
-عدلي: كتفها كويس وغمي عينيها واكتم بؤها ، وحطها في شطنة العربية
-شخص أخر : حاضر يا باشا

-عدلي في نفسه: قعدنا هنا مش مضمون أكتر من كده ، لازم أودي البت دي حتة تانية ، ايوه حتة محدش يشك فيها أبدااااااا .. وأنا عارف هوديها فين .. عند .. عند ناهــــــــــــد …………………………. !!!!
في المنزل القديم المهجور ،،،
في غرفة ما بداخله ،،،
كان يحاول أحد أفراد العصابة بث الرعب في يارا و….
-شخص أخر : يالا يا حلوة ، احنا ماشيين من هنا
-يارا بخوف: احنا…هــ… هنروح فين ؟؟
-شخص آخر: ولا أعرف يا حلوة .. بس آآآ.. عدلي باشا أمر اننا نتحرك ، وهنوديكي حتة تانية
-يارا برعب: ايييه ؟؟؟
-شخص أخر: الباشا أمر بكده
-يارا: آآ……
-شخص أخر: عارفة يا مزة ، لو مكنش الباشا جه الوقتي ، كنت.. هااااح .. قضيت معاكي ليلة نار عبرتلك فيها عن مشاعري ! آآآآخ … حظك يا حلوة ، بس يالا ملحوئة
-يارا: انت… انت قذر
-شخص آخر: القذارة هتيجي بعدين ، يالا معايا
-يارا: ابعد عني
-شخص ما وهو يحاول لمس جسدها : أبعد بس ازاي عن الجمال ده
-يارا: لا أرجوك ، أنا .. آآآ…

-عدلي من الخارج : انت يا حــــــــيوان !!!
-شخص ما: بــ…. باشا
-عدلي : كتف البت ووديها ع العربية
-شخص ما: ماشي

وبالفعل تم تقييد يارا وتكميمها ووضعها في حقيبة السيارة ، ثم حضر فرد أخر من افراد العصابة مسرعاً ليبلغ عدلي بـ …

-شخص ما: عدلي باشا ، يا عدلي باشا
-عدلي: في ايه ؟؟؟
-شخص ما وهو يلهث : الشـــ… الشرطة يا باشا مالية المنطقة ، راشقة في كل حتة ، و… وآآآآ .. شوية وهيبقوا عندنا !!
-عدلي: أنا كنت متوقع ده ، شوف العربيات جهزت ولا لأ
-شخص ما: حــ… حاضر يا باشا
-عدلي: لازم نمشي من هنا وإلا هنتمسك
-شخص أخر: عدلي باشا ، كله تمام ، البت في متكتفة في شنطة العربية ، واحنا جاهزين
-عدلي: تمام … يالا !

انطلق عدلي مع بقية أفراد عصابته بالسيارات إلى القاهرة ، بينما كانت دوريات الشرطة مازالت تمشط المنطقة ، ظلوا يبحثوا في كافة البيوت القديمة ولم يجدوا أي شيء ..
اتصل رامي هاتفياً باسلام ليبلغه بما حدث و…
-رامي هاتفيا: مافيش اي حاجة
-اسلام: يعني ايه مافيش
-رامي: يعني الدوريات وفرقة البحث اللي كانت طالعة معاهم فتشت كل المناطق اللي هناك وملاقتش أثر لأي حد .. جايز يكون البلاغ وهمي ، والست اتخيلت أي حاجة
-اسلام: جايز برضوه ، ع العموم شكراً يا رامي ، معلش تعبناك معانا
-رامي: متقولش كده ، وانا لو عرفت حاجة برضوه هبلغك
-اسلام: تمام

-وائل : ها يا اسلام في حاجة جديدة ؟؟؟
-اسلام: لأ للأسف مافيش
-وائل: يعني طلع كلام الولية ع الفاضي
-اسلام : ده احتمال ، وممكن يكون عدلي غير مكانه
-أيمن: ع العموم احنا برضوه هنكثف المراقبات ع الطريق لعل وعسى
-اسلام: اوك ، وانا هتصل بجاسر أبلغه باللي حصل
-وائل: تمام

اتصل اسلام بجاسر هاتفياً ليبلغه بأخر الأخبار و…
-جاسر بلهفة هاتفياً : الووو ، ايوه يا إسلام ، في جديد
-إسلام: لا والله يا جاسر ، للأسف لسه مافيش جديد ، الدوريات فتشت المنطقة كلها وملاقوش حاجة
-جاسر بضيق : أها .. ماشي
-إسلام: معلش ، ان شاء الله هنلاقيها ، احنا مش ساكتين
-جاسر: ان شاء الله

…………..
في منزل يارا بالغردقة ،،،،
اتصل جاسر بخالد ليبلغه أيضاً بما عرفه ، حزن خالد لعدم وجود أي أخبار تخص يارا ، وقرر أن يخبر أدهم ورأفت بما حدث و…
-خالد: آآآ…
-رأفت: في ايه يا خالد ؟؟؟
-خالد: جاسر لسه مكلمني من شوية
-أدهم: ها ؟؟ قالك حاجة ؟؟؟ لاقوها ؟؟ طب عرفوا مكانها ؟؟؟ وصلولها ؟؟ اكييييد وصلولها ، يالا نروح نشوفها بسررررعة
-خالد: اهدى يا أدهم ..
-رأفت: استنى يا أدهم أما نسمع من اخوك الأول
-ادهم: طيب ماشي قول بسرعة
-خالد : مافيش اي جديد
-ادهم: يعني ايه ؟؟؟
-خالد: يعني الشرطة دورت في المكان اللي شاكوا ان يارا تكون فيه وملاقوش حد ، المنطقة مهجورة !
-ادهم: يعني ايه الكلام ده ؟؟؟ يعني آآآ… يعني يارا ضاعت خلاص ؟؟؟
-خالد: ماتقولش كده ، ان شاء الله هنلاقيها ؟؟؟
-أدهم بنرفزة : هنلاقيها فين ؟؟؟ ها قووولي ؟؟؟ هنلاقيها فيييييييييييين ؟؟؟
-خالد: اهدى يا خالد
-رأفت: اهدى يا بني
-ادهم بنرفزة : اهدى ازاي وانا مش عارف مكان مراتي فين ؟؟؟ اهدى ازاي وانا مش عارف عنها أي حاجة ؟؟ عاوزني أهدى وأرتاح وهي الله أعلم ايه اللي بيحصلها الوقتي !!
-خالد: ان شاء الله هنلاقيها ، اطمن ، والله هنلاقيها
-ادهم: هنلاقيها ازاي ؟؟ قولي ازاي ؟؟؟
-رأفت: بتيجي ع أهون سبب يا بني
……..
اتصل عمر بأبيه رأفت ليبلغه بما فعلت والدته وبما فعله هو و…
-رأفت هاتفياً بعصبية : امك الظاهر عليها اتجننت
-عمر: مش عارف يا بابا ، بس أنا ماستحملتش ده ، مقدرتش اسكت
-رأفت: انت عملت الصح يا بني ، وأنا لما هرجع ليا كلام تاني مع أمك
-عمر: طيب
-رأفت: خلي بالك انت بس من نفسك ومنها لحد ما أرجع
-عمر: بابا
-رأفت: ايوه يا عمر
-عمر: لو عرفت حاجة عن يارا قولي
-رأفت: أكيد يا بني ، ادعي بس ربنا أنه يردها لينا بالسلامة
-عمر: يااااا رب انت العالم بالحال
…………………
في المستشفى التي ترقد بها ناهد ،،،
قررت ناهد أن تترك المستشفى التي ترقد بها ، وتعود مرة أخرى إلى فيلتها ، فارتدت ملابسها واستعدت للرحيل ، حاول الطبيب أن يمنعها ولكنها أصرت ع رأيها و…
-الطبيب: يا هانم ماينفعش حضرتك تمشي
-ناهد: انا زهقت وتعبت من الأعدة كده ، أنا هارجع بيتي تاني
-الطبيب: يا ناهد هانم اللي بتعمليه ده غلط
-ناهد باصرار: أنا مسئولة عن قراري ده ، ومتحملة كل العواقب
-الطبيب مستسلماً : اللي تشوفيه

-ناهد في نفسها : لازم قبل ما أرجع البيت أجيب شاهي معايا ، أيوه أنا هحاول ألم ولادي من أول وجديد حواليا وأعوضهم عن اللي فات …!!

انصرفت يارا من المستشفى ، واستقلت سيارة أجرة وتوجهت إلى المشفى الخاص بالأمراض النفسية من أجل اصطحاب ابنتها معها لتعودا سوياً إلى فيلتهم
……………….
في سيارة عدلي ،،،،
-عدلي هاتفياً: تمام ، انا هاخد بالي ، انت بس عرفني فين بالظبط أماكن الكماين
-المتصل: ………………….
-عدلي: لأ مش هنسالك الخدمة دي
-المتصل : ………………………..
-عدلي: اوك .. باي

-عدلي لأحد رجاله : اطلع من التقاطع اللي جاي
-شخص ما: ليه يا باشا ؟
-عدلي: من غير ليه ، انت تعمل اللي أنا بقولك عليه وانت ساكت !
-شخص ما: حاضر ..!

-عدلي في نفسه: كويس أوي انه بلغني بالكماين اللي قدام ، كان ممكن نتكشف فيها ، أحسن حاجة اني أدخل القاهرة من الطريق القديم ، ايوه محدش يعرفه إلا قليلين أوي ..

…………………
في فيلا رأفت الصياد،،،،،

كانت فريدة في قمة غضبها مما فعله عمر في حفلتها ، فصعدت إلى غرفته و…
-فريدة بحدة: ايه اللي انت عملته ده ؟؟؟
-عمر: أنا عملت الصح
-فريدة: انت .. انت بوظت حفلتي واحرجتني قصاد الناس كلها
-عمر: حضرتك عارفة ان الظروف ماتسمحش اننا نعمل اي حفلة
-فريدة: ظروف ايه دي
-عمر: خطف يارا يا ماما
-فريدة: يادي زفتة يارا اللي مش هاخلص منها أبداً
-عمر: لأ مش هاتخلصي منها ، عارفة ليه لأنها مش بس بنت عمنا لأ بقت مرات أدهم ، مرات ابنك
-فريدة: اووووف ، ياريت يموتها عشان أخلص منها للأبد
-عمر بضيق: بعد الشر عنها ، ان شاء الله اللي بيكرهوها
-فريدة: انت بتدعي عليا ؟؟؟
-عمر : لأ ، بدعي ع اللي بيكرها ، هو حضرتك بتكرهيها لا سمح الله ؟؟
-فريدة وهي تصفعه : اخرررررس ، انت فعلاً ولد مش متربي وقليل الأدب ..!!
-عمر: بتضربني يا ماما عشان بقول كلمة الحق ، ماشي معنديش مانع ، اضربيني كمان ، بس مش هاسكت عن اني أدافع عن يارا !!!
-فريدة: الله يحرقها !! اياك تخرج من أوضتك النهاردة ، وأنا هاعرف أربيك من أول وجديد وأعلمك ازاي تحترم أمك
-عمر: اعملي اللي حضرتك عاوزاه ، وع العموم أنا بلغت بابا باللي حصل !!
-فريدة: ايه ؟؟؟
-عمر: وهو لما يرجع بالسلامة هيربيني أنا من أول وجديد !!!
-فريدة بقلق : ر…رأفت عرف !!!!

انصرفت فريدة من غرفة عمر وهي تشعر بالقلق حيال معرفة رأفت بأمر الحفلة التي أقامتها في غيابه و…
-فريدة: رأفت عرف ، دي .. دي مصيبة كبيرة ، هاتصرف معاه ازاي ؟؟ طب هاقوله ايييه ؟؟ يعني كان لازم يا عمر تنسحب من لسانك ، اووووف !!!
…………………….

في فيلا ناهد الرفاعي ،،،،
وصل عدلي ومعه رجاله بالقرب من فيلا ناهد الرفاعي و..
-عدلي: في حارس أعد ع البوابة ، عاوزك تظبطه
-شخص ما: حاضر يا عدلي باشا
-عدلي: عاوز العملية تتم من غير ما حد يحس بحاجة فاهمني ، فضي السكة واديني التمام
-شخص ما: اطمن يا باشا ، اعتبر السكة جاهزة
-عدلي : اوك

ترجل أحد أفراد عصابة عدلي من السيارة ، وتوجه ناحية حارس الفيلا الخاصة بناهد الرفاعي و…
-شخص ما: والنبي يا ريس قولي فين فيلا شوكت
-الحارس: شوكت مين ؟؟
-شخص ما: شوكت بيه الدسوقي ، دول قالولي انه ساكن هنا
-الحارس: مافيش حد بالاسم ده في المنطقة ، انت متأكد انه ساكن هنا ؟؟؟
-شخص ما: ايوه يا باشا ، حتى بص في الورقة اللي كاتبنلي فيه العنوان
-الحارس : وريني كده

وما إن نظر الحارس في الورقة حتى انهال فرد العصابة بالضرب على رأس الحارس فأفقده الوعي ، ثم سحبه إلى داخل الفيلا وفتح البوابة ، وأعطى الاشارة لباقي أفراد العصابة لكي يأتوا للداخل
-شخص أخر: عدلي باشا ، الطريق فاضي
-عدلي: خش ع الفيلا ، وأقفل البوابة بعد ما ندخل
-شخص أخر: تمام يا باشا

دلف عدلي إلى داخل فيلا ناهد بسيارته ، ثم ترجل من السيارة وفتح صندوق السيارة وأمر أحد رجاله بأخذ يارا إلى الداخل و…
-عدلي: خد البت دي ع فوق
-شخص أخر: حاضر يا باشا
-عدلي في نفسه بثقة : أظن ان محدش هيشك أبداً ان البت دي هنا ، وخصوصاً ان الولية ناهد في المستشفى وابنها البأف لسه مسافر .. يعني هاقدر اخد راحتي هنا ، وافكر في الخطوة اللي جاية ، لازم أخد حقي واهرب من هنا .. ايوه ، مش هاضيع بقية عمري في البلد دي ..!!!

……………

في منزل يارا بالغردقة ،،،،
وصل جاسر إلى منزل جدة يارا بعد أن دله خالد على العنوان ، طرق باب المنزل ثم فتح له خالد و…
-خالد: حمدلله ع سلامتك يا جاسر
-جاسر: الله يسلمك يا خالد
-رأفت: ماكنش في داعي يا بني تيجي كل المسافة دي وانت تعبان
-جاسر: دي اختي يا عمي مش حد غريب !
-خالد: عندك حق
-جاسر: اومال فين أدهم ؟؟؟
-خالد: أعد في أوضة يارا ، قافل عليه الباب
-رأفت: حالته صعبة أوي
-جاسر: لا حول ولا قوة إلا بالله

……….
في داخل غرفة يارا بمنزلها في الغردقة ،،،
كان أدهم جالساً على فراش يارا وهو ممسك بصورتها ، يلوم نفسه مراراً وتكراراً لغفلته عنها و..
-أدهم بحرقة : أنا السبب ، كان لازم اخد بالي اكتر منك ، أنا وعدتك مش هاسيبك ، وطلعت مش أد وعدي ليكي ، أنا مش عارف فين أراضيكي ، أدور عليكي فين ؟؟؟ يارا !! انتي … انتي وحشتني أوي ، من غيرك الدنيا وحشة ، أنا مكونتش عارف اني بحبك أد كده ، بس ألاقيكي وهعوضك عن اي حاجة زعلت في حياتك كلها ، هعوضك عن كل اللي فات .. بس .. بس ألاقيكي الأول .. آآآآآه يا يارا ، هاموت عليكي آآآآه !!!

……………
في المستشفى الخاص بالأمراض النفسية ،،،
طلبت ناهد أن تأخذ ابنتها من المشفى على ضمانها الشخصي ، وتعهدت بأن توليها الرعاية اللازمة و…
-ناهد: أنا هاكون المسئولة عنها ، وهوفرلها كل اللي تحتاجه في البيت
-الطبيب: بس يا ناهد هانم خروجها من المستشفى في التوقيت ده ممكن يعملها انتكاسة
-ناهد: متخافش يا دكتور ، أنا هاكون معاها ، وجاسر اخوها برضوه ، ومش هانسيبها
-الطبيب: ولو إني أفضل انها تفضل هنا كام يوم
-ناهد: ارجوك يا دكتور ، أنا مستعدية أمضي ع أي ورق يحملني المسئولية لو حصلها حاجة ، بس أنا عاوزة بنتي تبات في حضني ، كفاية أوي كده ، كفاية بهدلتنا وبعدها عني
-الطبيب: ماشي يا هانم ، بس يا ريت حضرتك تتابعي معايا حالتها وتبلغيني بأي جديد لو حصل ، وكمان متنسيش الجلسات العلاجية ليها ، دول مهمين أوي في المرحلة دي
-ناهد: حاضر ، اطمن يا دكتور ، أنا مش هاسيبها أبداً ، وان شاء الله هتنتظم في الجلسات دي
-الطبيب: تمام يا هانم ، انا هاخلي الممرضة تجهزها ، وتقدري تاخديها معاكي
-ناهد: أنا مش عارفة أشكرك ازاي يا دكتور ، انت بموافقتك ع اني أخد بنتي معايا كأنك رجعتلي روحي تاني ليا
-الطبيب: يا ناهد هانم أنا اللي يهمني في الأول والأخر مصلحة الآنسة شاهي
-ناهد: أكييييد طبعاً

………………………..
في فيلا ناهد الرفاعي ،،،،

كان عدلي قد اطمأن ان مخططه يسير على مايرام ، هو لديه يارا في يده ، ويجهز حالياً لسفره إلى الخارج و…
-عدلي: أنا أمضي البت دي ع أوراق التنازل عن كل أملاكها في شركة أبوها ، وبعدها أكت ع بره ، أيوه ، بالظبط واعيش ملك زماني وأتمتع بعد الغلب اللي شوفته .. مممم… هاكلم بقى ياسر يخلصلي المطلوب عشان أقدر انجز في السريع ، صحيح هو ابن ستين *** وحراق في فلوسه ، بس الوحيد اللي هيعرف يظبطلي الورق اللي هاخرج بيه بره مصر

…….
طلب عدلي ياسر هاتفياً ليبلغه بما يريد و…
-عدلي هاتفياً: الوووو
-ياسر: لأ مش ممكن ! عدلي باشا بنفسه بيتعطف عليا ويكلمني ، ده الدنيا أكيد جرالها حاجة
-عدلي: ازيك يا ياسر
-ياسر: بخير يا عدلي ، ها عاوز ايه
-عدلي: مش تصبر لما أطمن عليك الأول
-ياسر: يا عدلي ده أنا عاجنك كويس وخابزك ، انت مش بتكلمني غير لما تكون عاوز مصلحة وبس ، فأقول عاوز ايه
-عدلي: عيبك انك فاهمني
-ياسر: طبعاً
-عدلي: عاوزك تضربلي ورق سليم أخرج بيه برا مصر
-ياسر : الله ! هو انت بقيت من اياهم !!
-عدلي: نعم ؟؟؟ تقصد ايه ؟؟؟
-ياسر: يعني من اللي بيضربوا ورق عشان يهربوا بره مصر
-عدلي: هاعمل ايه مضطر
-ياسر: اومال في حبايبك اياهم ؟
-عدلي: حبايب مين ؟؟؟
-ياسر: ايهيييه، بتوع المنظمة
-عدلي بتردد : آآآ… في .. آآآ.. يعني عندنا شــ.. شوية خلافات وكده
-ياسر : مممم.. قولتلي ، أصل أنا بلغني انهم اعتبروك كارت محروق ورموك رمية لامؤاخذة شبه رمية الكلاب

-عدلي في نفسه: يخربيت لسانك الزفر !
-ياسر: ساكت ليه ؟؟؟ الكلام جه ع الجرح ؟؟؟
-عدلي بضيق: لأ ، ماحصلش
-ياسر: أوعى تكون مفكرني نايم ع وداني يا عدلي ، ده أنا ليا لي عيون برضوه ، وبتبلغني بكـــــــــل حاجة
-عدلي: ان شاء الله كل حاجة هترجع زي الأول ، أنا بس اخرج برا مصر وهاظبط الدنيا كلها
-ياسر: ممممم…. ماشي
-عدلي: هاتجهزلي الورق امتى
-ياسر: في ظرف يومين بالكتير
-عدلي: تمام
-ياسر: بس هاخد كتير
-عدلي: هاااه ، يعني كام ؟؟؟
-ياسر: الورق ده هيكلفك .. آآآآ… مممم… نقول بتاع 2 مليون كويس
-عدلي بحدة: نعم ، بتقول ايييييه ؟؟؟
-ياسر: قليلين صح ؟
-عدلي: جرى ايه يا ياسر ، اطلب حاجة معقولة
-ياسر: معقولة !!! انت مستخسر 2 مليون في مقابل حياتك وحريتك
-عدلي: لأ كتير طبعااااااا
-ياسر: لأ مش كتير ، وبعدين أصلاً هما يجوا ايه في اللي هتكوش عليه من بت الصياد
-عدلي: هه
-ياسر: اها .. انا عارف انها تحت ايدك الوقتي ومعاها ملايين الملايين ، مستخسر بقى في صاحبك وحبيبك ياسر 2 مليون ، دول يدوب اتعاب الناس اللي تحت ايدي !!!
-عدلي: اوووف
-ياسر: عشان ماتنفخش كتير وتعملي فيها ع أخرك .. ده أخري معاك ، هاتدفع الفلوس هاخلصلك الورق ، مش هاتدفع دور ع حد تاني غيري ..
-عدلي : خلاص
-ياسر : خلاص ايه يا عدلي
-عدلي: خلاص هابعتلك الفلوس
-ياسر: كده تعجبني ، انت عارف حسابي رقمه ايه ، حولي عليه الفلوس ، النص قبل ما تستلم الورق ، والنص بعد ما تاخده !!!
-عدلي: طيب .. بس حاول تنجز
-ياسر : اشوف الفلوس الأول هتلاقي الحاجة وراها جاهزة
-عدلي : ماشي !!!!

……………………

وصلت ناهد وبصحبتها ابنتها شاهي إلى الفيلا ، اندهشت ناهد من عدم وجود الحارس بالبوابة ، ففتحت بنفسها البوابة بالمفتاح الذي معها ، ثم دلفت للداخل و…
-ناهد باستغراب: الله ! اومال الحارس ده راح فين ؟؟؟ المفروض يكون أعد هنا بيحرس الفيلا ، مممم…اكيد نايم ومش سائل ، طيب حسابه معايا أما أشوفه … يالا يا شاهي يا حبيبتي عشان ترتاحي في اوضتك
-شاهي: هو جاسر هنا
-ناهد بتردد : هه.. آآآآ… اه يا حبيبتي هو هنا ، ده … ده مستنيكي فوق
-شاهي: اوك

دلفت كلاً من ناهد وشاهي إلى داخل الفيلا ، وما إن أغلقت ناهد الباب خلفها حتى تفاجئت بوجود عدلي و….
-ناهد بدهشة : عدلي !! انت… انت بتعمل ايه هــــــــــــــــــــنا ………………………………….. ؟؟؟؟؟؟

*********************
إلي هنا ينتهي الفصل التاسع والثلاثون من رواية الفريسة والصياد بقلم منال سالم

تابعوا صفحتنا على الفيس بوك للمزيد من القصص الرومانسية
حمل تطبيق قصص وروايات عربية من جوجل بلاي

الوسوم
اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق